Mercedes-Benz янги EQ брендини ташкил қилди

Электромобилларни кўпроқ ишлаб чиқариш учун немис машинасозлари янги брендга эҳтиёж сезди. Mercedes-Benzнинг етакчиси Дитер Зетше Париж автосалони очилиши олдидан “Келажак электромобилларники” деди. Сўзининг исботи сифатида мерседесчилар кўргазмада Generation EQ янги концептини намойиш этишди.

Охирги икки ҳарф бренд номидир. BMW i  ҳарфидан фойдаланган бўлса, Мерседес экологик машиналари EQ ҳарфлари билан белгиланади.

Янги электромобиллар оиласи учун Штутгартда алоҳида платформа ясалади. Унинг конструкциясида пўлат, алюминий ва карбон ишлатилади.

Концептуал кроссовернинг балиқдек силлиқ ва ялтироқ ташқи қиёфаси Tron илмий-фантастик филми лавҳаларини эслатади. Қизиғи шундаки, кўплаб нишона нусхаларда (концепт) эшик тутқичи бўлмайди, ён кўзгулари ўрнига камералар ўрнатилади, бироқ серияли ишлаб чиқаришга келганда улар тушиб қолади.

“Mercedes-Benz келажагининг мобиллиги тўрт устунга таянади: ягона тармоққа уланиш, автоном бошқарув, каршеринг, электрли ҳаракатланиш қурилмалари”, дейди Daimler AG раҳбари Дитер Зетше.

Ҳақиқий келажак автомобилининг салони ҳам футуристик кўринишда бўлади. Mercedes-Benz анчадан бери интерьер устида ишлаб келмоқда. Режага кўра сенсор дисплейлар ҳайдовчининг ҳар томонини қуршаб туради, ҳаттоки, рулнинг кегайида ҳам бор. Асосий дисплейнинг диагонали эса 24 дюймга тенг. Бу ўртача телевизор диагоналидир.

Электромобиль 408 от кучига эга, айлантириш моменти 700 Н∙м. Юз тезликка 5 сонияда чиқади, йўл захираси 500 кмга тенг.

График интерфейсининг хусусияти вазиятга мослаша олишидир. Ундан йўловчилар ҳам фойдалана олади. Келажакда йўловчилар юмшоқ ўриндиқда ястаниб ўтирганча сенсор мониторни сийпалаб чексиз маълумотлар уммонига шўнғийди. Буни мерседесчиларнинг “ўзиюрар меҳмонхонаси” деб аташ мумкин.