Mercedes-Benzдан янги электрли юк машинаси

Urban eTruck номини олган муҳташам юк автомобилини Mercedes Ганновердаги тижорий транспорт кўргазмасида намойиш этди.

Mercedes-Benz Urban eTruck янги юк машинасининг прототипи бўлиб, Future Bus шаҳар автобуси ва Vision Van микроавтобуси билан биргаликда компаниянинг келажакдаги тижорий ва жамоат транспорти бўғимини шакллантиради.

Машинани иккита уч фазали электромотор ҳаракатга келтиради. Моторларнинг умумий қуввати 340 от кучига тенг, айлантириш моменти 1000 Н∙м. Двигателлар умумий сиғими 212 кВт∙соат бўлган учта литий-ионли батареядан озиқланади. Электромобилнинг стандарт версияси тўла заряди билан 200 км йўл босади.

Машина уч иш режимида ишлайди: Auto, Agile ва Eco. Биринчи режимда автоматика йўлдаги шароитга қараб тегишли қувватни ўзи танлайди. Agile номли иккинчи режимни енгил автомобилларнинг қутисидаги спорт режими билан қиёслаш мумкин. Eco режимига эса максимал йўл захираси хосдир.

Mercedes-Benz Urban eTruck замонавий технологиялар билан жиҳозланган. Масалан, орқани кўриш ойналари батамом камера билан алмаштирилган. Машинанинг планшетли компютери бор ва унинг ёрдамида техниканинг ҳолатини масофадан кузатиб турса бўлади.

Мерседесчилар Urban eTruckни 2018 йилдан бошлаб ялпи ишлаб чиқаришга ваъда беришяпти.