Mercedesнинг янги зирҳли машинаси билан танишинг

Mercedes-Benz компанияси G 500 4×4 базасидаги янги зирҳли автмобилни синашга киришди. Автомобилни Шимолий қутб доирасида қишки синов ишлари пайтида пайқаб қолиб суратга олинган.

Айни кунда зирҳли машинанинг техник тавсифига оид бирор-бир хабар маълум эмас. Олд бампери кучайтирилганлиги, шатакка олувчи зўғатаси (проушина) расмдан кўриниб турибди. Йўлсиз жойларда юриши учун ғилдираклари баланд ишланган, покришкаси қалин ва ғадир-будур, зина ўрнатилган.

Машинанинг синов нусхаси зирҳга ўхшаш махсус кузов панелига ўраб қўйилган. Туркум ишлаб чиқарилганида STANAG таснифи бўйича иккинчи даражали муҳофаза ўрнатилади. Бу дегани, 30 метрдан туриб 695 м/с тезликда отилган 7,62мм x 39 патроннинг зирҳтешар-ёндирувчи ўқини, 155 ммли осколкали-фугасли снаряд ва тубида портлаган мина зарбини тутиб қолади.

Зирҳли йўлтанламасга 3 литрли 181 от кучига эга V6 дизель мотор ўрнатилиш эҳтимоли катта. Двигатель 5 поғонали автоматик трансмиссия билан ишлайди. Тўла узатмали. Энг юқори тезлиги 140 км/соатни ташкил этади.

Mercedes-Benz зирҳли автомобилининг оммага кўрсатилиш муддати аниқ эмас.