Механик узатмалар қутисини танлашингиз учун тўққиз сабаб

Механик узатмалар қутиси ўрнатилган автомобиллар тобора тарихга айланмоқда. Йилдан йилда автоматик қутили автомобиллар кўпаяётганини уч тепкилидан кўра икки тепкили автомобилни бошқариш қулайлиги билан изоҳлаш мумкин. Аммо механик узатмалар қутисини моҳирона ишлатадиган ҳайдовчи автоматик қутини ёқтириб қолиши даргумон, ҳа, ишонаверинг. Биз механик узатмалар қутиси ўрнатилган автомобилни танлашингизнинг тўққизта сабабини жамладик. Ўқиб, фикр билдиринг.

1. Механик қути автоматик қутидан арзон

Механик трансмиссияли автомобиль автоматик қутидан ҳамиша арзонроқ юради. Ҳаттоки, энг арзон авторусумни харид қилганингизда ҳам механикали вариантини танлаб камида 500-1000 долларингизни тежаб қоласиз. Сотиб оладиган машинангиз қанча қиммат бўлса, шунча кўпроқ пул чўнтакда қолди, деяверинг.

2. Механик қутига хизмат кўрсатиш осонроқ

Механик узатмалар қутиси содда ва ишончли тизимдир. Бузилиб қолгудек бўлса, ҳар қандай автоуста тузата олади, таъмирлаш нархи арзон. Автомобилингизнинг хизмат муддати тугамай механик қути ишдан чиқмайди. Биргина уловчи механизмини алмаштирсангиз кифоя (ўртача 100-160 минг кмдан сўнг). 100 минг км ўтгач, мойини алмаштирасиз (кўпгина автомобилларда тўлиқ хизмат даври учун мой қуйилади). Шундай қилиб, механик қути автомати қутидан, роботдан ва вариатордан анча арзонга тушади.

3. Механик қути ёнилғини иқтисод қилади

Механик трансмиссияли автомобиллар автоматдан тежамкорроқ. Қути ричагини тўғри ишлатганда ҳамда уловчи механизм ва газ тепкисини тўғри босганда ўнлаб ва юзлаб литр ёнилғи иқтисод бўлади, демакки, ҳамёнингизга барака киради. Ҳатто, бошловчи ҳайдовчи ҳам ўртача ёнилғи сарфини автоматдан кўра 10-15 фоизга камайтириши мумкин. Айрим роботлар эса тежамкорлиги бўйича механиканинг яқинига ҳам келолмайди.

4. Механика тормозни асрайди

Механик трансмиссияли автомобилнинг тормози автоматлашган трансмиссияли автомобилнинг тормозидан анча секин едирилади. Демак, тормоз колодкалари ва дискларини аҳён-аҳёнда алмаштирасиз. Айниқса, автомобилни шаҳарда ҳайдаганингизда бу яхшироқ билинади. Қолаверса, механик қути ёрдамида двигатель ҳаракатини секинлаштириш жуда қулайдир.

5. Механика динамикани яхшилайди

Олдиндан айтиб қўяйлик – бу фақат қуйи ва ўрта нарх категориясидаги автомобилларга тегишлидир. Кўп дискли роботлар профессионал пойгачилардан ҳам тезкорроқ бўлиб кетган, шу сабабли “Формула-1”да аллақачондан бери автоматик қути ишлатилади. Аммо сиз билан биз ҳар куни спорткар ҳайдамаймиз. Светофорнинг яшил чироғи ёнганда ҳамиша механик қутили автомобиль олдинга сапчийди. Автоматик қути орқада қолади.

6. Механика машина вазнини енгиллаштиради

Механик қути автоматик қутидан енгил ва ихчамдир. Бу автомобиль динамикаси яхшиланиши ва ёнилғи сарфи камайишини англатади. Дарвоқе, у автомобилнинг тўла вазнини ҳам камайтиради. Қандай қилиб, дейсизми? Механик қути билан ишлаганда қўл ва оёқ мудом ҳаракатда бўлади. Ҳаракатчан ҳайдовчи семирмайди, озади. Қолаверса, жисмоний машқ ҳамма учун фойдали.

7. Механик қути ишдан бўйин товламайди

Аккумуляторингиз ўтирдими? Ўт олдиришда муаммо борми? Ғам еманг, 2-3та дўстингиз машинангизнинг орқасидан итарса, юриб кетади. Моҳир ҳайдовчилар муфтани босмасдан ҳам тезликни ўзгартира олади. Механик қутили автомобилни шатакка олса бўлади, ноилож вазиятларда оддий арқон билан тортиб олиб кетиш мумкин. Бироқ автоматик қути бўлса, буларнинг сира иложи йўқ, эвакуатор чақирасиз.

8. Механика хавфсиз

Механик трансмиссияли автомобилда тезланиш ва секинлашиш имкони кенгроқ. Ҳайдовчи двигателнинг  тягаси ва айлантирувчи моменти устидан тўла назорат ўрнатади, шунингдек, шошилинч тормозланишда қути ва двигателдан унумли фойдаланади. Қолаверса, сирғанчиқ ва ўнқир-чўнқир йўлда бошқариш ўнғай. Шу сабабли тезкор автомобилларнинг кўпига механик қути ўрнатилиб, автоспортда ўз ўрнига эга бўлади. Муҳими, ҳайдовчи ҳаракатланиш маромини инжиқ электроникага топширмасдан ўзи идора қилади.

9. Механика маҳоратни тоблайди

Механика ҳайдовчини бепарво бўлишга йўл қўймайди, рулда диққатини жамлашга ундайди. Айнан шу хислат бугунги ҳайдовчиларда етишмайди, деб баралла айта оламиз. Механик трансмиссияли ҳайдовчилар эгри чизиқ ва қия йўл бўйлаб машина бошқаришга моҳир бўлади, шунчаки рулни буришнигина уддалайдиган ҳайдовчига айланмайди.

quto.ru асосида тайёрланди