Минг от кучига эга автомобиль Женевада салонида

Германиянинг спорт автомобиллари ишлаб чиқарувчи Gumpert фирмаси маълум муддат касодга учраган деб эълон қилинганди. Ҳозир унинг асосида Apollo Automobili компанияси яратилди.

Янги компания 700 от кучига эга спорткар (Gumpert Apollo) ишлаб чиқариш лойиҳасини давом эттирди. Спорткарга янги Apollo N номи берилди.

Apollo Automobili компанияси Женевага Apollo Arrow суперкарини келтирди. Машина ясалишида карбондан кўп фойдаланилганлиги туфайли 1300 кг тош босади. Осмаси (подвеска) ростланади. Тўрт литрли твин-турбо моторга эга. Машина минг от кучини ўзида жамлаган, айлантириш моменти ҳам 1000 Н∙мга тенг.

Apollo Arrow юз тезликка атиги 2,9 сонияда эришади, икки юзга эса 8,8 сонияда. Энг юқори тезлиги 360 км/соат. Спорткар умумфойдаланиш йўлларида юриши учун сертификатга эга. Бир оз ишлов берилса, FIA стандартига мос пойга автомобилига айланади.