Mitsubishi ихчам электромобиль тайёрлайди

Бу ҳақда компаниянинг ижрочи директори Осаму Масуко Австралияга қилган сафари давомида айтиб ўтган. Масуконинг айтишича, Хитой ва АҚШ сингари йирик автомобиль бозорларида электромобилларга бўлган талабнинг кескин ортиши, ишлаб чиқарувчиларни бу борада жиддий мулоҳаза юритишга ундамоқда.

Электрда ҳаракатланадиган кроссовер ўтган йили Токио автосалонида тақдим этилган Mitsubishi eX базасида яратилади. Электрокар ҳар бири 95 та от кучига эга иккита электр моторлари ва сиғими 45 кВт/соат бўлган литий-ионли аккумулятор билан таъминланади. Автомобиль тўлиқ зарядланган бундай батареялар ёрдамида 400 км масофа босиши мумкин.

Кроссовернинг ташқи қўриниши Dynamic Shield услубида яратилиб, концептдан катта фарқ қилмайди. Бироқ электрда ҳаракатланишни таъминлайдиган механизмда жиддий ўзгаришлар бўлиши кутилмоқда.

Модель автоном бошқариш, бошқа автомобиллар билан уланиш ва хавфсизлик тизимларига эга бўлади. Чамаси, кроссовер Mitsubishi ASX моделининг ўрнини босолмайди, балки компания ихчам кроссоверлар сегментини тўлдиради, холос. Бундан ташқари, ушбу модель йирик япон автомобиль ишлаб чиқарувчисининг илк электр қувватида ҳаракатланадиган кроссовери бўлади. Агар айни вақтда Mitsubishi автомобиллари фақат чекланган ҳудудларда сотилаётган бўлса, ушбу янги кроссоверни нафақат Европа, Япония ва АҚШ бозорларида, балки Жанубий Америка, Австралия ва Жанубий-шарқий Осиё давлатларида харид қилиш мумкинлиги айтилмоқда.

Модель Россияда ихчам Mitsubishi i-MiEV ўрнини эгаллаши мумкин. Сабаби Россияда ҳам электрокарларга талаб юқори. Мазкур модель Россиядаги энг муваффақиятли автомобиль ҳисобланса-да, 2013 йилнинг баҳоридан бери жами 249 дона сотилган.