Opel Astra’нинг универсали 200 килограммга енгиллашди
Opel компанияси янги авлод Astra Sports Tourer’нинг универсалини расман намойиш этди. Модель конструкциясида юқори ва ўта юқори даражада мустаҳкам пўлатдан кенг фойдаланилгани сабаб, «Астра»нинг оғирлиги, модификациясидан келиб чиққан ҳолда, ўртача 200 килограммга камайди: моделнинг базавий (энг оддий) версияси энди 1263 килограмм тош босади.
Янги авлод универсалининг габарит узунлиги 4702 миллимтер, кенглиги 1871 миллиметр, баландлиги эса 1499 миллиметрга тенг. Шундай қилиб, модель эски авлодга нисбатан тўрт миллиметр узун, 57 миллиметрга кенг ва 37 миллиметрга паст.
Opel орқа ўриндиқлар йиғилганда ҳосил бўладиган багаж учун жой ҳажми ҳақидаги маълумотларнигина ошкор этди — юк учун жами 1630 литр жой бўлиб, бу моделнинг эски версиясидаги кўрсаткичдан 80 литрга кўп. Моделнинг орқа бампери остидаги узатгич (датчик)га оёқ билан тегинилса, машинанинг бешинчи эшиги ёпилади (ёки очилади — заруратга кўра).
Astra Sports Tourer’нинг моторлар гаммаси ҳажми 1,0 литрдан 1,6 литргача бўлган бензинли ва дизелли турбодвигателларни ўз ичига олган бўлиб, уларнинг қуввати 95—200 от кучи оралиғидадир.
Универсалга ўрнатилган асбоб-ускуналар рўйхатида, масалан, асосий чироқнинг матрицавий ёруғлик диодли фаралари, Apple Carplay ва Android Auto функцияларига эга мультимедиа тизими, шунингдек, бир қатор хавфсизлик тизимлари, хусусан, ҳаракатнинг равонлигини кузатиш хоссаси ва тўқнашув ҳақида огоҳлантириш тизими бор.
Кейинги авлод Opel Astra Sports Tourer универсалининг омма олдидаги илк намойиши сентябрь ўрталарида, Франкфурт автосалонида бўлиб ўтади. Модель савдоси Германияда октябрь ойида бошланади.