Ўроқсимон фарали Volvo V90 Женевада кўрсатилди

Мотор-шоудан шведлар ҳам четда қолгани йўқ. Вольвочилар V90 русумини йиғилганлар эътиборига ҳавола қилди.

Кузов анча чўзиқ ишланган, олдида “Тора болғаси” услубидаги фаралар, орқа чироқлари эса …ўроқ шаклида.

Салон S90 русумини эслатади: катта экран, бошқарув тугмалари, сенсорлар ва ҳоказо. V90 асосида S90 ва XC90 билан умумий SPA модуль платформаси ётганлиги бежиз эмас. Универсал автомобилимизнинг ғилдираклар базаси 2941мм, габарити 4938х2019х1475мм. Орқа ўриндиқлар тахланганда юкхона ҳажми 1526 литрга етади.

Шведларнинг фахрий универсал русуми беш турдаги мотор билан ишлаб чиқарилади. Т5 — 2 литрли бензинли версия (254 от кучи); Т6 — 2 литрли (320 от кучи, тўла узатма); Дизель модификациялари D4 (2 литр, 190 от кучи) ва D5 (2 литр, 235 от кучи). Бу гуруҳнинг энг пешқадам версияси гибрид мотор бўлиб жами 410 от кучини етказиб беради.

Универсал ярим автоном ҳаракатланиш режимига эга бўлиб, йўл белгиларини танийди, автомобилдан ташқари пиёдалар, ҳайвонларни ҳам пайқаб автоматик тормозланади. Кўплаб электрон қўшимча қурилмаларга эга. Volvo V90 универсал бўғимига келажакда Cross Country йўлтанламас версияси ва яна бир ҳашаматли модификацияси қўшилади.