Париж автосалонининг энг ғалати автомобили намойиш этилди

Кузови ғижимларган гофра қоғозни, шакли эса “Лего” конструкциясини эслатувчи бу ғаройиб автомобиль муаллифи японлар деган хаёлга боради киши. Бироқ уни француз инженери ясаганлиги “устаси фаранг” иборасини яна бир бор тасдиқлайди.

Ушбу ғалатимобиль электрда юради. Орқасида иккита электромотор ўрнатилган бўлиб, умумий қуввати 101 от кучига тенг. Энг юқори тезлиги соатига 160 км. Юз тезликка 10 сонияда эришади. Машина 800 кг тош босади. Электромобилга жойланган 28 кВт∙соат сиғимли батареялар 240 км йўл захирасини таъминлайди. Батареяларнинг оғирлигини алюминийдан ясалган кузовнинг енгиллиги мувозанатлайди.

Асли буни кузов дейиш ҳам қийин. Салон очиқ, йўловчилар моторнинг устида ўтиради. Ўриндиқлари эгарсимон, худди отда сайр қилгандек 🙂  Йўловчиларнинг тепасини каттакон антиқанот пана қилади. Рул чамбараги йўқ, мотоцикл каби бошқарилади, ҳайдаш услуби ҳам мото/авто аралаш.

Formula GIOL номли ушбу электромобилни Лучано Жиол исмли инженер ясаган. Бу унинг учинчи электромобили. Бунгача қуёш батареяли прототиплар ясаган. Инженер бу тоифа машиналарни сайр ва ишқибозлик учун яратади.

Жиолнинг антиқа машинасига харидор чиқармикан? Эҳтимол. Сотилмаган тақдирда “Ақлсиз Макс” филмининг навбатдаги сони учун продюсерларга пулласа бўлади 🙂