Покистон Derways Cowboy йўлтанламасини ишлаб чиқармоқчи

Покистоннинг Karakoram motors фирмаси Derways Cowboy автомобилининг конструкторлик ҳужжатларини сотиб олди ва ишлаб чиқаришга рухсатномани қўлга киритди.

Derways 3131 Cowboy йўлтанламаси Россияга тегишли бўлиб, 2003 йилда руминларнинг ARO автомобили асосида ишланган. Cowboy атиги бир ярим йил мобайнида юзга яқин нусхада ишлаб чиқарилган. 2005 йилда касодга учраши оқибатида лойиҳа ёпилган.

Karakoram motors фирмаси Chery QQ енгил машинаси, Changan юк машинаси ва микроавтобуси, Gonow пикапи ва йўлтанламаси, Raftar мотоциклини ишлаб чиқаради. Фирма ушбу заводида “Ковбой” ишлаб чиқаришни режалаштиряпти.

“Ковбой”нинг кўплаб хусусиятлари ўзгаришсиз қолади. Тайёр автомобилни 15 минг доллардан сотиш мўлжалланяпти.

Бундан ташқари Karakoram motors эгаси Абдул Воҳид TagAZ Aquila лойиҳасини ҳам харид қилди ва Карачидаги заводда каркас-панелли хэтчбек ишлаб чиқармоқчи.