Қўлда йиғилган учар мотоцикл видеосини томоша қилинг

Британиялик ихтирочи ўз гаражида “учар мотоцикл” йиғди ва “Абдуллажон” фильми қаҳрамонлари сингари ҳавога парвоз қилди.

Бу галги видеолавҳа қаҳрамони британиялик ихтирочи ва телебошловчи Колин Фёрз. У ўзининг антиқа ихтиролари билан шуҳрат қозонган. У, масалан, болалар аравачаси ва ялпоқ тувакка (унитаз) реактив двигатель ўрнатган. Муз ғилдиракли велосипед ясаган ва ногиронлар аравачасини 110 км/соат тезликда ҳайдаган.

Фёрз ўз тилида “ховербайк” деб атовчи учар мотоциклини алюминий қувур ва пластик қопламалардан ясади. Учиш аппаратининг олди ва орқасига парапланёрчилар ишлатадиган парракли икки двигатель ўрнатди. Бу ишга бир ойча вақт сарфлади, мотоцикл вазни устида ишлаш кўп вақтни олди. Видеолавҳада томоша қилишингиз мумкин, учар мотоцикл бошқаришнинг бир оз ҳадисини олган “учувчи” эпчиллик билан парвоз қила олади.