Қозоғистонда тўй кортежи тез ёрдам машинасига йўл бермади

Қозоғистоннинг Оқтўбесида тўй кортежи йўлда ҳаракатланишга тўсқинлик қилиб, тез ёрдам машинасини ўтказиб юбормаган. Тез ёрдам машинасида ёруғлик сигналлари ёқиқ бўлган, бироқ сиренаси ишламаган. Кўринишича, бахтиёр ёшлар тез ёрдам машинасини сезмай қолишган, деб Kun.uz ёзмоқда.

«Мана бугун тўй кортежи шу тариқа тез ёрдам машинасини ўтказиб юбормади. Мигалка ёқиқ бўлган, бироқ сирена ишламаган. Ҳурматли ҳайдовчилар, тез ёрдам машинасини ўтказиб юборинг ва қийинчиликлар яратманг!», деб чорладилар ролик чоп этилган ZELLO AKTOBE саҳифаси маъмурлари Instagram’да.

Видеодан кўринишича, видео тез ёрдам машинаси ичидан олинган.

Тўй кортежининг бу «қилмиши» кўпчилик томондан танқидга учради. Тўй кортежларининг ўзбошимчалигидан «тўйган» фойдаланувчилар уларни «куракда турмайдиган сўзлар» билан койиб кетишган.

Ўз навбатида саҳифа маъмурлари бундай воқеалар ортидан кузатиб, қоидабузарлар тез ёрдам машиналарини ўтказмаган роликларни чоп этишга ваъда бердилар. Улар шу тариқа тез ёрдам шифокорларининг оғир ишларида озгинча бўлса ҳам ўз ёрдамларини бермоқчилар.