Range Rover Sport янгиланди
Land Rover компанияси янгиланган Range Rover Sport йўлтанламасини намойиш қилди. Янги автомобиль аввалгисидан кучли мотор ва такомиллашган мултимедиа тизими билан фарқланади.
Ушбу моделда компания илк марта дизелли тўрт цилиндрли мотордан фойдаланган. Гап 2.0 литр ҳажмга эга Ingenium туркумидаги дизель ҳақида кетмоқда. Бундай мотор 240 от кучига эга бўлиб, 8 секундда 100 км/соат тезликка эришади. Максимал тезлик эса 208 км/соатни ташкил этади.
Моделга 10 дюймли InControl Touch Pro мултимедиа тизимида ишлайдиган сенсорли экран ўрнатилган. Ҳайдовчи такомиллашган мобил илова ёрдамида баъзи функцияларни масофадан туриб бошқариши мумкин. Мисол учун, смартфон автомобиль юрган энг оммабоп маршрутларни эслаб қолади ва уни автоматик тарзда сунъий йўлдош навигация тизимига юборади.
Янгиланган Range Rover Sport шу йилнинг охирида Европа сотувга чиқарилади. Аммо унинг нархи ҳали маълум эмас.