Rolls-Royce ғилдирак аркаси тўртбурчак бўлган нишона нусхани кўрсатди

Лондондаги Roundhouse мажмуасида Vision Next 100 автомобили нишона нусхасининг тақдимоти ўтказилди. Янги прототип 2040 йилда пайдо бўладиган ҳашаматли ҳайдовчисиз автомобилни гавдалантиради.

Янги автомобиль мутаносиблиги (пропорция) бўйича Phantom Extended Wheelbase русумига мос келади. Узунлиги 5,9 м, кенглиги эса 1,6 м. “Роллс-Ройс”нинг бошқа автомобиллари сингари капотида “Экстаз кайфияти” шакли жойлаштирилган. Автомобилнинг мутлақо ўзига хос жиҳати тўртбурчакли ғилдирак аркаларидир. Арка ичкарисида 28 дюймли ғилдираклар бор.

Автомобиль муаллифлари унинг қиёфасини “қойилмақом” деб ифодаламоқда, машина соҳибига “мислсиз қулайлик” яратиб, индивидуал мавқе бағишлайди.

“Биз Rolls-Royce Vision Next 100ни яратишда атайин мозийга қайтиб иш кўрмадик. Биз максимал инновацион нарса яратиш билан бирга афсонавий марканинг анъанавий қиёфасини авайлаб сақлаб қолишини истадик”, дейди Rolls-Royce Motor Cars дизайн бўйича директори.

“Ультралюкс” синфига мансуб автомобиллар (шу жумладан, Rolls-Royce Vision Next 100) алоҳида ёндашув (Personal Vision) асосида яратилади, ҳайдаш қулай (The Effortless Journey), муҳташам қаср (Grand Sanctuary) ва тантанали ташриф (Grand Arrival) тамойиллари асосида ясалади. Масалан, машинанинг бўлғуси эгалари ўзига тегишли русумни лойиҳалаш жараёнида иштирок этиши мумкин.

Бироқ Rolls-Royce Vision Next 100нинг техник кўрсаткичлари ошкор этилмади. Компания вакиллари 12 цилиндрли ички ёнув двигателининг келажаги йўқлигини таъкидламоқда, лойиҳа муаллифлари эса автомобилни “келажакнинг кучли экологик двигатели” ҳаракатга келтиришини айтмоқда. У машинанинг ғилдираги гупчагига ўрнатилади.