Россияда электромобилни қувватлаш шохобчалари қурилади

Россиянинг федерал шоҳкўчалари бўйлаб ҳар 60 кмда электромобилларни тезкор қувватлаш шохобчалари қурилади. Зарядлаш станцияси 500 В кучланиш ва 125 Ампер ток кучига эга.

Тезкор зарядлаш шохобчаларининг дастлабкилари йўл хизматининг кўп функцияли зоналарида ишга тушириб бўлинди.

2016 йилнинг 1 январ ҳолатига кўра Россияда жами 647 электромобиль бор, деб хабар бермоқда “Автостат” агентлиги. Мамлакатда энг оммалашган электромобиль Mitsubishi i-MiEV саналади, улар сони 237 дона (барчасининг 36,6 фоизи).

Иккинчи ўринда Tesla Model S бўлиб, у 152та (23,5 фоиз). Учинчи ўринда Nissan Leaf, 145 дона. Булардан ташқари Россия йўлларида юзтадан камроқ Lada Ellada (14 фоиз), Renault Twizy (14 дона) ва BMW i3 (8 дона) электрли автомобиллари юрибди.

Электрокарларнинг энг кўпи (235 дона) Москва шаҳрида қайд этилган. Шунингдек, мамлакатнинг Приморье, Самара, Краснодар, Санкт-Петербург, Татаристон, Хабаровск ҳудудларида электромобиллар учрайди.

Мамлакатга олиб кирилган электромобиллардан бож тўлови ундирмаслик тўғрисидаги қарор шу йилнинг охирига қадар амал қилади. Бекор қилинган 19 фоизли ставка Евроосиё иқтисодий иттифоқи (Россия, Арманистон, Қозоғистон, Белоруссия ва Қирғизистон) ҳудудида амал қилади. Гибрид моторли автомобиллар имтиёзга эга эмас.

Россияда расман сотиладиган электрокар Mitsubishi i-MiEV холос.