Собиқ иттифоқнинг қўлбола автомобиллари
1963 йилда “Техника-Ёшлар” журнали Москвада қўлбола автомобиллар танловини ўтказган. 80-йилларга келиб қўлбола машина хоббига айланиб кетганди. Айрим қўлда ясалган машиналар заводда чиқарилгандан ҳам кўркам ва иш унуми юқорироқ эди. Бунинг устига “заводской” машинани харид қилиш учун йиллаб навбатда туришни айтмайсизми?
Қуйида эътиборингизга 1987 йил откриткаларида тасвирланган совет қўлбола автомобилларини ҳавола этамиз. Улар 1983-84 йилларда иттифоқ автопойгасида, шунингдек, халқаро автопойгаларда иштирок этган машиналардир.
“Мул”. “Хачир”га ВАЗ-2101 двигатели ўрнатилган. Ретро-жип дейиш мумкин. Аниқроғи, 4×4 эмас, 4×2.
“Алтай”. Бунга ҳам ВАЗ-2101 мотори қўйилган. Беш ўриндиқли машинанинг чап тарафида битта, ўнг тарафида иккита эшиги бор.
“Лаура”. Қиёфаси суперкарларни эслатади. ВАЗ-2105 двигатели ўрнатилган. Унинг ноёблиги борт компютери ўрнатилганлигидадир.
“Бычок”. Бунга ҳам ВАЗ-2101 мотори қўйилган. Миттигина “буқача”.
“Сайгак”. ВАЗ-2101 двигатели ўрнатилган. Ралли ва туризм учун мўлжалланган “Сайғоқ”нинг кузови шишапластикдан ишланган.
“Катран”. Ёшларбоп туризм автомобили. ВАЗ-2101 двигатели ўрнатилган. Кузови икки хил материалдан ишлангани эътиборга молик: қуйи қисми металл, юқориси шишапластикдан.
“Ласка”. 2+2 компоновкали машинага ВАЗ-2103 мотори ўрнатилган.
“Юна”. Совет “Феррари”си деганлари шу бўлади. Двигатели ГАЗ-24ники. Унда 500 минг кмдан ортиқ йўл юрилган.
“Тритон”. Амфибиянинг қуруқликдаги тезлиги соатига 110 км, сувда 50 км. Двигатель ГАЗ-21ники.
“Ихтиандр”. Дюралюминий корпусли амфибиянинг сувдаги тезлиги паст, атиги 18 км/соат.
“Кентавр”. Ўтувчанлиги юқори автобусча овчи ва балиқчиларга мўлжалланган. Двигатели ВАЗ-2101ники.
“Дружба”. Бу микроавтобусга ҳам “копейка”нинг мотори қўйилган.
“Золотой лист”. Пластик кузовли шаҳар автомобилининг мотори ЗАЗ-968дан олинган. Ўзи ҳам миттигина.
Carzone.Uz сайтининг фаол муаллифларидан. Автомобилни ҳашамат эмас, ҳаракатланиш воситаси деб билади. Йўлдаги шиори: "Юзда юрма, юзга кир"
Баҳам кўринг:
