Тайванликлар Tesla’нинг рақибини европаликларга намойиш этди
Тайвандаги ёш Thunder Power компанияси Tesla Model S билан рақобатлашиши мумкин бўлган электр седанни тақдим этди. Янги автомобилнинг премьераси Франкфурт автосалонида бўлиб ўтди.
Номи ҳозирча ошкор этилмаётган тўрт эшикли ушбу янги автомобил оғирлиги 2 минг килограммга тенг. Седан икки хил — 308 ва 428 от кучига эга электромоторли версияларда таклиф қилинади. Автомобилнинг энг кучли варианти беш сонияга етмаёқ соатига 100 километрлик тезликка эришади, унинг энг юқори тезлиги электроника ёрдамида соатига 250 километр билан чеклаб қўйилган.
Ҳар иккала модификация ҳам сиғими 125 киловатт/соат бўлган аккумляторлар блоки билан таъминланади — ишлаб чиқарувчиларнинг сўзларига кўра, мазкур аккумляторлар бошқа кўплаб муқобилларига нисбатан арзонроқ, енгилроқ ва чидамлироқдир. Қайд этишларича, 300 километр йўл босиш учун автомобилни ярим соат қувватлантирса бўлди.
Thunder Power компанияси автомобиллари асосан Хитойда ишлаб чиқарилади. Айни вақтда, тайванликлар автомобилларни 2017 йилда Европада ҳам ишлаб чиқаришни йўлга қўйиш ниятида.