ULTRA AP зирҳли машинаси тўғрисида икки оғиз

2005 йилда Жоржия Технология институти АҚШ Ҳарбий денгиз вазирлиги билан шартнома асосида ULTRA AP зирҳли машинасининг янги авлодини ишлаб чиқди. Тўрт йил ўтгач, ULTRA II авлоди тақдим этилди. Машинага катта умид боғланган эди. Хўш, умидни оқладими?

Зирҳли машина оддий Ford F-350 пикапи асосида ясалган. AP қисқартмаси Armoured Patrol (“зирҳланган патруль”) маъносини англатади. Инженерлар пикап билан ҳарбий автомобилни омихталаштирган. Зирҳига қарамасдан автомобиль енгилгина чиқди – атиги 4 тонна тош босар, HMMWV (Hummer) автомобилига қараганда 6 баробар кам ёнилғи сарфларди.

Ўриндиқлари ва камари NASCAR пойга болидидан олинган. Кабина шундай лойиҳаланганки, барча тарафни, жумладан тепани ва орқани ҳам кўриш мумкин.

ULTRA II берк кузови ичида тўрт йўловчини (десантларни) ташийди. Туби ва ғилдираклари пухта ҳимоялангани боис мина ҳам таъсир этмайди.

Аммо ўша йиллари армиянинг эскираётган автомобилларини янгилаш дастури асосида American Motors, Lockheed Martin, BAE Systems, General Tactical Vehicles каби йирик фирмалар ўз инженерлик ишлари билан рақобатга киришиб кетди. Фуқароларнинг “Форд” автомобили асосида яратилган ҳарбийча ULTRA кўплаб устун тарафларига қарамасдан рақобатда енгиб чиқа олмади.

Шундай қилиб моҳирона ишланган нишона нусха концептлигича қолиб кетди. Ҳарбийча автомобиллар танловида эса Oshkosh L-ATV ҳарбий концерни ғолиб бўлди.