Хитойнинг Qoros 3 седани электрда ҳаракатланишни ўрганди

Qoros Automotive Хитой-Исроил қўшма корхонаси Qoros 3 Q∙Lectric электроседанининг сериялаб ишлаб чиқарилишидан аввалги прототипини намойиш этди.

Электроседан ўзининг бензинда ҳаракатланувчи “эгизаги”дан радиатор панжарасининг янгилиги, бамперлари, олд ва орқа бампердаги EV ёзувлари билан фарқ қилади. Салонда эса атиги битта ўзгариш бўлган — тезлик узатиш қутиси ричаги ўрнига металл диск-селектор ўрнатилган.

Автомобилнинг оғирлиги 1750 килограмм, “тўлиқ бак” билан 350 километргача йўл боса олади, соатига 160 километргача тезликка эриша олади.

Автомобиль аккумляторларининг уйдаги оддий, маиший розеткадан тўлиқ қувватлантириш учун саккиз соат керак бўлади. Махсус қувватлантириш станциясида эса бир соат ичида автомобиль 80 фоиз қувват олади.

Автомобилнинг бошқа техник тафсилотлари ҳозирча маълум эмас. Тахминларга кўра, машина 2016 йилнинг учинчи чорагидан бошлаб ишлаб чиқарилиши мумкин.

Qoros 3 Q∙Lectric Хитой бозорида неча пулдан сотилиши ҳозирча номаълум, бироқ седаннинг бензинда ҳаракатланувчи модификацияси 15 510 доллардан сотилмоқда.