Яна бир компания ёнилғи сарфини қалбакилаштирди

Suzuki Motors компанияси ўзи ишлаб чиқарган автомобилларнинг ёнилғи сарфини қалбакилаштириб тақдим этган.

Бундан олдинроқ Mitsubishi маркаси машиналарининг ёнилғи сарфини 1991 йилдан бери нотўғри усулда ўлчаб келганлиги ошкор бўлган, “ёнилғи можароси” туфайли чорасиз аҳволга тушган компанияни қутқариш учун унинг 34 фоиз акциясини Nissan харид қилган эди.

Энди Suzuki шундай ҳолатни бошидан кечирмоқда. Ички текширувлар кўрсатишича, 2010 йилдан бери ўлчаш ишлари давлат ўрнатган талабларга мос усулда бажарилмаган. Хусусан, ёнилғи сарфи ҳақиқий йўлда эмас, аэродинамик қувурдаги ўлчаш майдончасида ҳисобланган.

Suzuki автомобилсозлари ўзларини оқлаш учун корхонанинг синов полигони ноқулай жойда, тоғ баландлигида ўрнашганини айтишди. Полигон жойлашган баланд ҳудудда кучли шамол эсиб туради ва ҳаво тез-тез ўзгаради. Шу сабабли ёнилғи сарфини аниқ ўлчаб бўлмайди, дея важ кўрсатишди.

Нотўғри ўлчов маълумоти билан 16 турдаги 2,3 млн автомобиль ишлаб чиқарилган. Suzuki реал шароитдаги ўлчов натижаси билан лаборатория шароитидаги ўлчов натижалари орасида фарқ йўқлигига харидорларни ишонтиришга уринмоқда.