Янгиланган УАЗ Патриот прототипи кўрсатилди

Аввалроқ сайтимизда янгиланган “УАЗ Патриот” ҳақида тафсилотлар пайдо бўлгани ҳақида хабар берилган эди. Куни кеча мазкур автомобилнинг янгиланган версияси оммага намойиш этилди.

АвтоВАЗнинг матбуот хизмати маълумот беришича, превью прототип Приморье ўлкасида қоплонлар популяцияси билан шуғулланадиган “Дальневосточные леопард” ташкилотига совға қилинган.

Янгиланган Патриот қора-кулранг металл рангига бўялган. Йўлтанламас 2,7 литрли, 134,6 от кучига эга мотор билан таъминланган. Рестайлинг модель кучайтирилган эргономика, қўшимча шовқин изоляцияси, климат-контроль, круиз-контроль, руль чамбарагини иситиш тизими билан ажралиб туради. Шунингдек, орқа қўприк дифференциалини блоклаш механизми ҳам кўзда тутилган.

Салонга мультимедиа тизими, сенсорли экран, орқа томонни кўрсатадиган камера, олд ва орқа парковка датчиклари ҳамда кўп функцияли руль ўрнатилган.

Аввалроқ УАЗ бутун атрофни кўрсатадиган электрон тизим билан таъминланган Патриот моделининг синов версиясини намойиш қилган эди. Янги моделда эса бутун атрофни кўрсатадиган камера ва  хавфсиз парковка учун ультратовушли датчиклар бирга кўлланилган.

Шунингдек, ҳаракат вақтида автомобиль жорий қатордан чиққанда ёки олдинда тўсиқ мавжуд бўлганда огоҳлантирадиган  ADAS-камералари ҳам кўзда тутилган. Кейинги УАЗ Патриот моделларида тўрт камерали ADAS видеорегистраторларини ўрнатиш, йўл белгиларини автоматик тарзда танийдиган тизимни қўллаш, узоқ ва яқинни ёритишни автоматлаштириш ҳамда динамик паркинг чизиқларини ишга солиш режалаштирилган.