Японлар қиммат ва ўта қулай таксиларга ўтмоқчи

Япония таксиси катта ўзгариш арафасида турибди, деб ёзмоқда Reuters агентлиги. Ҳукумат автомобилсозлар олдига таксиларни замонавийлаштириш вазифасини қўйди. Бунинг сабаби таксилар жуда эскириб кетганлигидир. Японияда, асосан, Toyota Crown Comfort автомобили кира қилади. Toyota Crown 22 йил олдин ишлаб чиқарилган бўлиб, Токионинг 70 фоиз таксилари ундан иборат.

“Кроун Комфорт”нинг ўрнини Toyota JPN Taxi эгаллаши кутилмоқда. Ушбу концепт 2013 йилда намойиш қилинган, 2017 йилдан эса серияли ишлаб чиқаришга тайёр бўлган. Режага кўра, 2020 йилда Японияда Олимпия ўйинлари бошланишида Токио автопаркининг учдан бири JPN Taxiдан таркиб топади.

Бу такси седан эмас, мотори ҳажми бир литрли машиналардан иборат бўлади. Эътиборлиси шундаки, инженерлар уни кекса ва имконияти чекланган йўловчилар учун ҳам мос қилиб ишламоқда. Чунки Япония аҳолиси орасида кексаларнинг улуши жуда катта, яъни 27 фоиз аҳоли 65 ёшдан ошган.

Янги таксининг салони беш кишига мўлжалланган бўлади. Орқа эшиклари автоматик очилади. Юкхонасининг ҳажми 401 литр, керак бўлса, унга ногиронлар аравачаси жойлаштирилади. JPN Taxiнинг кенг-мўл ойналари товуш ўтказмайди.

Такси суюлтирилган табиий газда ҳам юраверади. Ишлаб чиқарувчилар унинг анчагина тежамкорлигини таъкидламоқда. Машина баҳоси 3,2-3,5 иен бўлади. Бу тахминан 30 минг доллар дегани.

Японияда такси тутиш арзон эмас. 20 дақиқалик сафар нархи 30-40 доллар туради. Аммо кунчиқар юртда такси хизмати жуда сифатли йўлга қўйилганлигини эътироф қилиш керак. Оқ қўлқопли ҳайдовчи салондаги махсус тутқич ёрдамида эшикларни очиб беради, чамадонингизни кўтаришга ёрдамлашади, беҳуда гап-сўз билан бошингизни қотирмайди ва ёқимсиз мусиқа тинглашга мажбур бўлмайсиз. Дейлик, мабодо таксида ноутбукингизни унутиб қолдирсангиз, албатта, элтиб беришади ва узр ҳам сўрашади. Бундан ташқари Японияда томи очиладиган таксилар ҳам бор. Улар тўй ва тантаналарда хизмат қилади, чунки келиннинг серҳашам бош кийими салонга сиғмай қолиши мумкин. Ҳа, тантана ва дабдабани севадиган фақат бизлар эмас.