Йўл ёқасига чиқинди ташламанг

Австриялик ташаббускорлар ҳайдовчи ва йўловчиларнинг йўл ёқасига чиқинди ташлашдек зарарли одатини йўқотишга енг шимарди.

Маҳаллий ўзини-ўзи бошқариш органи бу муаммони арзимас деб ҳисобламайди, чунки машинадагилар йўл четига отиб юборган алюминий банкалар, шиша ва пластик идишлар ҳамда сигарет қолдиқлари кўчани ифлослантирибгина қолмай, табиатга ҳам зарар келтирмоқда.

Ҳукумат ҳар йили йўл ёқаларини чиқиндидан тозалаш учун ҳашар ташкил қилади, аммо ҳайдовчи ва йўловчилар кўчани ифлослантиришни бас қилмайди. Бу ҳолга зудлик билан чора кўриш таклифини маҳаллий фермерлар киритди. Чунки сўнгги вақтда йўл ёқасида ўтлаган ҳайвонлар банка, шиша ва бошқа чиқиндиларни ютиб юбориб касалланмоқда, оғир ҳолатларда ўлимгача олиб бормоқда.

Ҳайдовчиларни тартибга чақириш учун муниципалитет (маҳаллий ўзини-ўзи бошқариш органи) раҳбари янги тартиб жорий қилди. Энди чиқиндини йўл четидан тозалабгина қолмай, ҳар бир сигарет пачкаси ва қолдиғи, шиша идиш топилган жойга сариқ пластикдан кўрсаткичли қозиқча ўрнатиб чиқилади. Тушунтириш ўрнида ёнига сигир расмини солиб “Чиқиндилар мени касаллантирмоқда” деб ёзиб қўйилди. Ҳаммаси бўлиб 300га яқин кўрсаткичли қозиқча қоқиб чиқилди.

Бу ишни маҳаллий кўнгиллилар амалга оширишди. Бир ойдан сўнг қозиқчалар олиб ташланади, шунда улар қанчалик самара берганини баҳолаш мумкин.