Юнонистон автомобиллари билан танишинг

Ўтмиши буюк, бугуни инқирозли, замонавий технологиялар ҳақида гап кетганда номи деярли эсланмайдиган Юнонистоннинг ҳам ўзига хос автосаноати, ярим асрдан бери мавжуд брендлари бор.

Юнон автомобилсозлиги 1960-70 йилларда гуллаб-яшнаган. Гуллаб-яшнаган десак тўла ифодалай олмаймиз, қисқа муддатда 30 завод ташкил этилганини машинасозликда сакраш дейиш мумкин. Ҳозирда ушбу заводлар бўшаб қолган, айримлари ёпилган. Бу ҳодиса қишлоқ хўжалигида фойдаланиш мумкин бўлган ҳар қандай автомобилни қишлоқ хўжалик техникаси сифатида таснифлаш мумкинлиги тўғрисида давлатнинг чиқарган қонуни билан изоҳланади. Қонун жорий этилгач, солиқ тизими ўзгарди ва “қишлоқ хўжалиги мақсадида” ишлаб чиқарилган йўлтанламас ва юк машиналарини тайёрлаш кескин ортди.

1980 йилда қонун қайта кўриб чиқилди. Шундан сўнг юнон автосаноати икки ой ичида кескин қисқариб кетди.

Юнон автомобиллари орасидан суперкарларни қидирманг. Қуйида тақдим этадиган суратларимизда оддий русумлар бўлиб, фермерларга мос пикаплар, юк машинаси ва автобуслардан иборатдир.

Трицикл-пикап юнонларнинг энг машҳур транспорт воситаларидан бири. Афинадаги Ros (ΡΩΣ) фирмаси 1966-1976 йиллар мобайнида ишлаб чиқарган трицикллардан аҳоли ҳалигача фойдаланмоқда.

Трицикл-пикап

Saracakis компанияси автобус ишлаб чиқариш бўйича кўп йиллар Biamaxнинг рақобатчиси бўлган. Компанияга 1922 йилда асос солинган бўлиб, 1954 йилдан бери автобус ишлаб чиқариб келмоқда (тўғрироғи, ҳозирги кунда бошқа шассига кузов ўрнатмоқда). Расмдаги 1966 йилда ишлаб чиқарилган шаҳарлараро қатновчи Saracakis SB85 автобуси.

Saracakis SB85

Юнонистоннинг иккинчи катта шаҳри Салоникидаги Motoemil компанияси 1970 йилдан 1985 йилгача трицикл ва енгил йўлтанламаслар ишлаб чиқарган. Расмдаги 1977 йилда ишлаб чиқарилган Motoemil Autofarma автомобилидир.

Motoemil Autofarma

1960-йиллардаги трициклларнинг муваффақиятидан руҳланган бир гуруҳ тижоратчи Sunnyclist брендига асос солди ва мазкур транспорт воситасининг иккинчи умрини бошлашга уринди. Расмда 2015 йилга мансуб иккинчи авлод Sunnyclist трицикли акс этган.

Sunnyclist

Қишлоқ хўжалиги транпорти ишлаб чиқарувчи Namco 70-йиллардаги компанияларнинг бири. Инқирозни бошдан кечирган, 2003 йилдан буён машина ишлаб чиқармасдан импорт билан шуғулланади. Расмда 1986 йилда ишлаб чиқарилган Namco Pony Super “қишлоқча Жип”и акс этган.

Namco Pony Super

Бу расмдаги Neorion Chicago 4×4 русуми 1974 йилда ишлаб чиқарилган. Neorion юнонларнинг энг ёши улуғ фирмаларидан бўлиб, 1861 йилда ташкил топган. 1972 йилдан 1976 йилгача қисқа муддат давомида енгил электромобиллар ҳам ишлаб чиқарган. Суратдаги эса бензинли “люкс” русумидир.

Neorion Chicago 4×4

1979 йилда ишлаб чиқарилган EBIAM 4×4 қишлоқ хўжалиги учун мўлжалланган йўлтанламасларнинг биридир. EBIAM бу русумни 1979 йилдан 1984 йилгача ишлаб чиқарди.

EBIAM 4×4

Салоникида 1975-1984 йилларда фаолият юритган AutoDiana компаниясига тегишли AutoDiana Unicar юк машинасини суратда кўриб турибсиз. Машина дизайни жуда содда.

AutoDiana Unicar

Расмдаги DIM 652 автомобили DIM компаниясига тегишли, аммо ялпи ишлаб чиқарилгунча бормай молиявий муаммолар сабаб иш тўхтаган. 1982 йилда эса компания бутунлай тугатилди.

DIM 652

Biamax узоқ йиллар давомида автобус ишлаб чиқаришда етакчи компания бўлган. Бу номдаги автобуслар 1956 йилдан 1986 йилгача ишлаб чиқарилган. Расмда 1966 йилда чиқарилган Biamax F580 русумидир.

Biamax F580