2015 йилда Россия бозорини 62 русум тарк этди

Ўтган йили Россияда машиналар савдоси 36 фоизга пастлаши билан бирга турфа автомобиль русумлари камайиб кетиши кузатилди. Автосалонлардан 62 русум йўқолиб қолди. Бунинг сабаби кўпчиликка маълум: рубль курсининг пастлаши туфайли авто ишлаб чиқарувчилар рақобатбардош нархни сақлаб туролмади.

Чиқиб кетган машиналарнинг энг кўпи General Motors ҳиссасига тўғри келади: саккизта Opel русуми ва яна саккизта Chevrolet.

Chevrolet Orlando Россияда энг кўп сотиладиган компактвэн эди

2014 йилнинг декабридаёқ SsangYong автомобилларининг келтирилиши тўхтатилган эди. Шундан бери дилерлар омборда сақлаб қўйилган русумларни сотишган. 2016 йил январига келиб кўргазма майдончаларида фақат Actyon кроссовери қолган, у ҳам яқинда тугайди. Хитойнинг Great Wall фирмаси ҳам худди шундай ҳолатда: машина йиғиш ва импорт қилиш тўхтатилганига бир йилдан ошди, омбордаги захиралар тугаёзди.

SsangYong Actyonни ҳозирча дилерлардан топса бўлади, аммо бир йилдан бери келтирилмаяпти

Honda эса дилерлар билан ишлашнинг янгича тартибига ўтган: энди сотувчилар марказий импорт омборини четлаб ўтиб компания заводларига ўзлари буюртма беришади ва дарҳол ўз киссаларидан пулини тўлашади. Honda CR-V кроссовери сотиляпти, баҳоргача Honda Pilot русуми ҳам етади, Civic ва Accord эса қолмади ҳисоб.

2008 йилда Honda Civic савдоси энг қизғин йил бўлиб қолди. Ўша йили 36 минг нусха сотилган эди

Россия автобозоридан Ford (Galaxy, S-MAX, Ranger, Edge), Nissan (Navara, NP-300, Teana), Renault (Logan биринчи авлод, Scenic, Latitude), Citroen (DS5, C1, C4-хэтчбек), Mazda («иккилик», «бешлик», CX-9) ва Toyota (Auris, Verso, Venza) русумларининг қораси ўчди. Volkswagen (Touran, Scirocco) ва Suzuki (Splash, Swift) русумларининг сафи сийраклашиб қолди.

 Nissan Teanaнинг бозори Toyota Camryдан кўра сустроқ эди

Hyundai-Kia концерни эса кўп нарса йўқотмади: фақатгина Hyundai Grandeur седани чиқиб кетди холос. Олиймақом (премиум-класс) машиналардан BMW, Mercedes ва Audi (дизель русумлари камайди) қолган. Аммо икки эшикли Infiniti Q60 ва Lexus CT 200h гибрид хэтчбеки бозорни тарк этишни афзал кўрди.

Hyundai Grandeur Кореянинг энг машҳур автомобиллари бешлигига киради, лекин Россиянинг эмас

АвтоВАЗ декабрга келиб хэтчбек ва универсал кузовли Приора ишлаб чиқаришни тўхтатди, седаннинг эса икки оддий комплектацияси қолди холос.

Бундан буён Лада Приора фақат седан кузови билан ишлаб чиқарилади

Россия бозорларига олиб кирилиши мўлжалланган машиналар кам эмас эди, аммо инқироз туфайли кирита олишмади. Остонадан қайтган машина русумлари орасида Chrysler 300C, Fiat 500X, Mazda CX-3, BMW Active Tourer иккинчи туркуми, Opel Corsa, Skoda Fabia, SsangYong Tivoli ва Ford Mustang ва Renault бор.