Америкаликлар олти ғилдиракли эксклюзив пикап тайёрлади

Техасдаги Hennessey Performance тюнинг-ательеси Ford F-150 пикапининг Hennessey VelociRaptor 6×6 номини олган экстремал версиясига ишлов берди.

Тюнинг-ательеда пикапнинг беш литрли двигатели ўрнига 3,5 литрли EcoBoost твин-турбо мотори қўйилди. Капот остидан яхшироқ турбина, спортча филтрлар жой олди. Совутиш тизими такомиллаштирилди, янги газ-чиқарув тизими ўрнатилди.

Натижада автомобиль қуввати 450 от кучидан 600 от кучига етди. Машинанинг ташқи кўриниши ҳам сезиларли ўзгаришга учради. Учинчи ўқ пайдо бўлганлиги сабабли бироз узайди. Янги бамперлар, пешонасига чироқлар илинди. Осмаси яхшиланди, 20 дюймли ғилдирак дисклари қўйилди.

Махсус версиялари учун Brembo тормоз механизмларини буюртма берса бўлади. Шунингдек, буюртмачи истагига кўра интерьерининг пардози қиёмига етказиб берилиши ҳам мумкин. Дастлабки Hennessey VelociRaptor 600 Supercharged 73 500 доллар турса, тюнинг-ательеда кучайтирилган нусха 292 661 туради.

Бу нархга Америкада бинойидек суперкар харид қилса бўлади. Аммо пикапимиз эксклюзив чиққанини эътироф этмасдан иложи йўқ. Расмларга қаранг.