Асфальт остига геопанжара тўшаш нега керак?

Йўлни асфальтлашдан аввал тупроққа геопанжара қоплаш Ғарбда 1980-йиллар ўрталаридан урфга кирган.

1991 йилда АҚШнинг “Саҳродаги бўрон” амалиётида қумликдан танк ўтиши учун геопанжаралар тўшалганидан сўнг бу тажриба жуда оммалашиб кетди. Дастлаб геопанжарани АҚШнинг Presto Products Company ширкати ишлаб чиқара бошлади. Ширкат тупроқни барқарорлаштириш тизими ва Geoweb геопанжаралари технологиясига (полиэтилен тасмаларни бириктириш усули) халқаро патент олди.

Presto компаниясининг геопанжара ишлаб чиқариш учун патенти муддати якунига етганини айтиб ўтишимиз жоиз. АҚШ қонунчилигида бу муддат 15 йил этиб белгиланган, сўнг инновация илм-фан мулкига айланади.

Геопанжаранинг афзаллиги узоқ хизмат қилиши, сиқилиш ва тортишишга бардошлилиги, оғирликни атрофга тенг тақсимлаши, намлик, ўзгарувчан ҳарорат, моғорлаш ва кимёвий моддалар таъсирига чидамлилигидир.

Геопанжаралар тупроқни синч каби тутиб туришдан ташқари йўлни таъмирлаш ишлари муддатини ҳам узайтиради. Эрозия ва ювилиш жараёнларига қаршилик кўрсатади, шамол учириб кетишининг олдини олади.

Қуйида йўлга геопанжара ётқизиш жараёнини томоша қилинг.