Audi “инсонийроқ” автопилот ишлаб чиқди

Audi компанияси ўзини “инсонийроқ” тута оладиган ва қарор қабул қилишда ҳаракатнинг бошқа иштирокчиларини ҳам ҳисобга олишни ўрганган автопилот тизимининг янги вариантини синовдан ўтказди. Motor.ru’нинг хабар беришича, A7 моделига ўрнатилган технология A9 автомагистралининг Германия ҳукумати томонидан синов мақсадлари учун ажратилган қисмида текширилган.

“Ауди” мутахассислари автопилот томонидан бошқарилувчи автомобилларни нисбатан табиийроқ ҳаракат қилишга ўргатди. Электроника ўз ишини шундай тартибга соладики, автомобилнинг манёврлари йўл ҳолатининг бошқа иштирокчилари ҳаракатига мувофиқ келади.

Масалан, ҳаракатланиш бўлагини алмаштириш вақтида электроника ён томондаги огоҳлантирувчи чироқларни ёқади. Юк машиналарини қувиб ўтишда эса тизим автомобиллар орасидаги ёнлама оралиқнинг кўпроқ бўлишига эътибор қарата олади, навигация тизими бўлса сўровга асосан автопилот билан ҳаракатланиш имкони кўпроқ бўлган йўллар орқали манзилга етиш йўлини топа олади.

Audi A7 автомобили апрель ойининг бошида A9 трассаси бўйлаб тўлиқ автоматик режимда ҳаракатланган. Тақдимот юришида Германия транспорт вазири Александр Добриндт ҳам иштирок этган.

Аввалроқ Audi SQ5 кроссовери инсон иштирокисиз Сан-Францискодан Нью-Йорккача бўлган йўлни босиб ўтган эди, A7 модели эса Калифорниядан Невадагача саёҳат қилган эди.