Автомобилга оид саккиз миш-миш

Автомобиллар ҳақида турли паст-баланд гаплар юради. Айримлари тўғри бўлса, бошқаси беҳуда гап холос. Кимга ишониш керак? Келинг, бугун шу ҳақда суҳбат қурамиз. Биз автомобиллар ҳақида тарқалган саккизта асоссиз хабарни тўпладик.

Замонавий двигателларга белгиланган масофа босиб ўтилгандан сўнг ёриладиган қумли капсула жойланади. Шубҳасиз, бу нотўғри гап. Тўғри, автомобиллар такомиллаша борган сари мураккаблашди, бироқ афсуски, ишончлилиги камайди. Аммо машина ишлаб чиқарувчилар двигателга қандайдир сирли капсула эмас, асосий механизмлари бузилмасдан кафолат муддатини ўташи учун муайян ресурс жойлашади. Ҳозир таниқли маркалар ҳам автомобили 10 йилгача бузилмасдан 300 минглик масофани босиб ўтиши ҳақида қайғурмайди. Чунки бу автомобилни ҳаддан зиёд қимматлаштириб юборади. Янги машина харид қилаётган одамга бу керакми? Йўқ, “чунки умримнинг охиригача минаман”, деб оладиганлар камдан-кам. Яна бир тарафи экологик омилдир. Йилдан йилга экологик талаблар қаттиқлаша боради, шу боис двигателни йигирма йил ишлайдиган қилиб чиқаришдан маъно йўқ.

Автомобилга бензин тўлдираётганда уяли телефонда гаплашиш хавфли, портлаш юзага келиши мумкин. Бу ҳам одамлар орасидаги миш-миш. Ҳаттоки, бензин буғи билан тўлган муҳитда ҳам фаол ҳолатдаги мобиль телефондан таралган нурланиш портлашни келтириб чиқаролмайди.

Автомобилнинг тутун чиқарадиган қувурига бирор нарса тиқиб қўйилса, машина ўт олмайди. Эски фильм ва мультфильмлардаги таниш лавҳа. Бу ҳақиқатга тўғри келмайди. Синаб кўрилганда қувурга тиқилган нарса мотор юргизилиши биланоқ отилиб чиқиб кетган.

Ёнилғи бакига шакар сепилса, двигатель ишдан чиқади. Бу ҳам киноларда учрайдиган ҳол: шум ниятли қаҳрамон бак оғзига шакар сепади ва машина қоққан қозиққа айланади. Ҳақиқатда эса шакар бакнинг бўғзидаги тўрдан ўтиб кетган тақдирда ҳам двигателга зиён етказмайди.

Агар двигатель радиатори тешилса, тухум билан ямаш мумкин. Бу эски чора наф беради. Тўғри, шошилинч ҳолатлардагина қўллаш мумкин. Радиатор оғзига чақилган тухум сув қайнаши натижасида пишади ва босим билан тешик томонга ҳайдалиб, уни беркитади. Дарвоқе, бу мақсадда янчилган мурч, ун ёки хантал (горчица) кукунини ишлатса ҳам бўлади.

Олд ойнага компакт-диск ёпиштириб радарга чап бериш мумкин. Тезликни оширишга ўч ҳайдовчиларни қизиқтирувчи миш-миш. Бугун шаҳар кўчаларида ойнасига компакт-диск ёпиштирган машинани учратмаймиз. Аммо илгари кўп ҳайдовчилар катта умид билан “диск радар тўлқинини қайтараркан”, дея камалаксимон товланувчи юмалоқ лаппакни ойнага ўрнатиб юрган.

Ойнани очгандан кўра кондиционерда юрса, ёнилғи сарфи озроқ бўлади. Бу ҳолатларни тарозига солиб кўриш керак. 88 км/соат тезликда синаб кўрилганда, ҳақиқатан, очиқ ойнадан кўра кондиционер ёнилғини тежаши маълум бўлди. 72 км/соат тезликда синов эса ойнани очиб қўйиш тежамкорроқлигини кўрсатди. Гап шундаки, 80 км/соатга яқин тезликда ҳаво қаршилиги ёнилғи сарфига таъсир қила бошлайди. Хулоса шуки, ёнилғи тежашни истаган ҳайдовчи 80 км/соатдан паст тезликда ҳайдаса, ойнани тушириши керак, бу тезликдан оширса, кондиционерни ёққани маъқул.

Орқа ойна ёки ўриндиқнинг остидаги ёстиқ ё салфетка қути ҳам тўқнашувда одамни ҳалок қилиши мумкин. Хавотир олишга ҳожат йўқ, бу ҳам беҳуда гап. Аварияга учраганда ўткир жисм ёки бир кгдан ортиқ нарса орқадан олдинга қараб учади ва ўлимгача олиб келиши мумкин. Аммо енгил нарсалар йўловчи ҳаётига кўпам зарар келтирмайди.