АвтоВАЗ: Kalina ва Vesta асосидаги янги кроссовер

Аввалроқ АвтоВАЗ янги Lada XCODE кроссоверини яратиш устида иш бошлагани ҳақида хабар берган эдик. DROM нашрининг ёзишича, яқин кунларда лойиҳани бошқариш учун расмий директор тайинланади.

Модель Lada Kalina ва Lada Vesta автомобиларининг лойиҳалари асосида яратилади. Масалан, унинг олд қисмига (лонжерон конструкцияси, олд илгак ва руль механизми) Lada Vesta дизайни асос вазифасини бажарса, куч каркасининг дизайни эса Lada Kalina моделидан олинади. Бироқ каркас, албатта, бошқа кузов панеллари билан такомиллаштирилади.

Lada XCODE ўлчамлари бўйича Renault Duster автомобилидан ихчам бўлиши кутилмоқда. Ғилдирак базаси Kalina’га қараганда бир неча миллиметрга каттароқ (2 476 мм), Duster моделидан (2 673 мм) эса  сезиларли даражада кичикроқ бўлиши мумкин.

XCODE’ни ялпи ишлаб чиқариш 2018 йилнинг ўрталарида бошланади.  Умуман олганда, кроссоверни лойиҳалашга тахминан 9 ой вақт кетади, қолган вақт эса синовларга ажратилади.