Энг зўр пикаплар ўнлиги билан танишинг

Пикап (инг. pick-up) очиқ юк платформали, асосан орқаси тортадиган (олди тортадигани камдан-кам учрайди), юк ташишга мўлжалланган бақувват автомобилдир. Тўла узатмали версиялари ҳам учрайди. Ҳозирда у йўлтанламас машинага айланиб бўлди. Қўпол кўринишли пикапни озгина тюнинг қилса ва бир оз сайқалланса, қулинг ўргилсин маҳобатли автомобилга айланиб турибди.

Carzone.uz дунёдаги энг машҳур 10 пикап ҳақида маълумот беради. Мазкур автомобиллар пишиқ-пухталиги ва шиддаткор қиёфаси билан  эътиборингизни тортмасдан қолмайди.

Энг аввало Dodge Ram 1500 Hellcat пикапини эсга оламиз. Унга ўрнатилган 6,2 литрли двигателда 707 от кучи бор. Dodge компанияси 2017 йилги версиясига турбодамлаш технологияли двигатель ўрнатилгач, янада кучли бўлишини ваъда қиляпти.

Dodge Ram 1500 Hellcat

Иккинчи ўринни Ford F150 Shelby банд қилди. Унда етти юз отнинг кучи бор. Жорий йилда чиқарилган версиясига яна ўн от кучи қўшилди. F150 Shelby серияси чекланган миқдорда ишлаб чиқарилган, яъни беш юзта.

Ford F150 Shelby

Учликдан HPE650 GMC Sierra пикапи ҳам ўрин олган. Унинг 6,2 литрли V8 моторининг қуввати 650 от кучига тенг. Дарвоқе, бу пикапга Hennessey Performance студияси ишлов берган.

HPE650 GMC Sierra

Тўртинчи ўринда немисларнинг Mercedes-Benz G63 AMG 6×6 автомобилидир. 5,5 литрли двигатели 554 от кучига эга. Немис машинаси етти поғонали автоматик қути билан ишлайди.

Mercedes-Benz G63 AMG 6×6

2004 йилгача ишлаб чиқарилган Dodge Ram SRT-10 пикапига бешинчи ўрин берилди. Кузовининг силлиқлигини кўряпсизми? Унга ҳар қандай тюнинг-ателье ҳавас қилади. Асос версиясига V10 8.3 двигатель ўрнатилади ва у 505 от кучини етказиб беради.

Dodge Ram SRT-10

Пикаплар ўнлигида япон русумларига ҳам жой топилади. Tundra TRD автомобили билан Toyota олтинчи ўринни банд қилди. Toyota Tundra TRD ательесининг қўлига тушди ҳамда 504 от кучига эга бўлган 5,7 литрли двигатель билан ательедан чиқди.

Tundra TRD

Ford F-150 пикапининг махсус версияси бўлмиш SVT Raptor барча пикаплар учун намунадир. У, даставвал, 6,2 литрли V8 мотор билан жиҳозланган бўлиб, 416 от кучига эга эди. Ўн учинчи авлоди 3,5 литрли EcoBoost V6 билан чиқарилди. “Форд”нинг “Раптор”и абжир машина бўлиб, 5 метргача сакрай олади.

Ford F-150 SVT Raptor

Умуман олганда пикаплар бўйича етакчи давлат Америкадир. Саккизинчи ўриндаги Cadillac Escalade EXT SLP ҳам “америкалик”. Унинг асосий рақобатчиси Ford F-650. Cadillac пикапининг 403 от кучига эга бўлган 6,2 литрли V8 двигатели бор.

Cadillac Escalade EXT SLP

Chevrolet SSR пикапи гарчи ўйинчоқ машинадек кўринса-да 390 отнинг кучи бор. Пикапларнинг аксарияти тажовузкор қиёфада бўлса, Chevrolet пикапи ювош-мўмин кўринади.

Chevrolet SSR

Ford F-650 пикапи рўйхатимизнинг ўнинчи поғонасида бўлишига қарамасдан ҳашамати билан кўзни қамаштиради. Пикап ишқибозлари учун бензинлидан ташқари дизелли версияси ҳам ишлаб чиқарилади. 350 от кучига эга.

Ford F-650

Автомобиль ишлаб чиқарувчилар йилдан йилга инженерлик мўъжизалари билан ҳайратлантиришда давом этмоқда. Янгиликларнинг амалиётга татбиқида пикаплар етакчи ўринда турибди дейиш мумкин.