Эртанги кун универсаллари: Porsche Panamera, янги Alfa Romeo ва Mini Clubvan

Универсал кузовли автомобиллар бизда деярли оммалашмаган, бироқ европаликлар бундай авторусумларни хуш кўради. Немисларнинг Auto Bild нашри биз қайси универсалларни яқин келажакда қарши олишимизга аниқлик киритди.

Уларнинг биринчиси Porsche Panamera Sport Turismo универсали бўлиб, 2017 йилда ишлаб чиқарилади. Техник кўрсаткичлари яқинда тақдим этилган хэтчбекникига ўхшаш бўлиб, 422, 440 ва 550 от кучига эга моторлар ўрнатилади. Аждодларидан томи, орқа устунлари ва юкхона қопқоғининг ўзгачалиги билан фарқланади.

Alfetta Sportwagon

Alfa Romeo келгуси йилда намойиш этадиган янги русумининг номи Alfetta Sportwagon дея аталади. Автомобилнинг орқа ва тўла узатмали версиялари бор. Итальянлар BMWни ўзларига рақобатчи сифатида кўрмоқда. Афсуски, универсалнинг двигатели хусусида бирор маълумот йўқ.

Mini Clubvan

Энг тўпори универсал эса Mini Clubvan деб номланган. Унинг кўрсаткичлари BMW 2 Active Tourer авторусуминикига монанд, бироқ ташқи кўриниши ўзимизнинг советча машиналарга ўхшайди. Бу авто ҳам 2017 йилда кўриниш беради. Дарвоқе, универсал тасвирини Auto Bild рассоми компютерда чизганини тан олади 😉