Етти давлат раҳбарларининг шоҳона автомобиллари

Доналд Трампнинг автомобилларига ҳамманинг ҳаваси келади. Трампнинг ўзи “Кадиллак”ни ёқтиради. Унга атаб 8 тоннали махсус “Зверь” (The Beast) автомобили ясалаётгани ҳақида carzone.uz хабар берди.

Хўш, бошқа мамлакат раҳбарлари қандай машинада юради? Биз бугунги мақоламизда президент ва монархларнинг “арава”сига тўхталамиз.

АҚШда президент машинаси отиб ташланади

15 йилдирки АҚШ президентларини General Motorsнинг “Йиртқич” (The Beast) номли лимузини олиб юради. Бу битта машина эмас, бутун бошли автомобиллар оиласи бўлиб, ҳар йили такомиллаштириб турилади. Президентнинг ҳар бир муддатида автомобиль ҳам янгиланади, аммо концепцияси ўзгармай қолади.

АҚШ президентининг “Йиртқич” (The Beast) номли автомобили

Буш давридан бери бу енгил лимузин эмас, шассиси пишиқ зирҳли капсулали узун йўлтанламасга айланган. Тузилишига кўра у General Motors фуқаро автомобилларидан фарқланувчи мустақил автомобиль. Фақат Cadillac услубида бежалган ҳамда каттакон Escalade йўлтанламаси билан ўхшашлиги бор.

Шасси конструкциясида GMC Kodiak C4500нинг айрим узеллари ишлатилган, бироқ кўпчилик узел ва агрегатлари ўзиникидир. Масалан, “Йиртқич”да 6,5 литрли 8 цилиндрли дизел мотор бор. У 400дан ортиқ от кучига эга.

Ўрнатилган ноёб дизел мотор ҳамахўр ҳайвон кабидир – унга сифатсиз ёнилғи қуйилса ҳам тортаверади. Ёнилғи сарфи борасида эса танкни йўлда қолдиради: 100 кмга 30 литр. 100 км/соат тезликка эришиши учун 15 сония сарфлайди.

Зирҳли капсула ташқи дунёдан иҳоталанган. Ичкарида кислород баллонлари ҳамда кимёвий ҳужумдан мудофаа тизими бор. Машина гранатомёт зарбасига дош беради, зирҳининг қалинлиги 18 смгача боради. Эшиклари банк сейфининг тавақаси каби ишланган. Президент тушадиган эшикни очиш учун соқчи ташқаридан иккала қўли билан тортади.

Cadillac One транспорт ташувчи С-17 Globemaster самолётида олиб юрилади.

Ўтган йилдан президент автомобилини такомиллаштириш ишлари бошланди. Янги нусха чаққон фотомухбирларнинг нишони бўлишга ҳам улгурди. Шундай қилиб Доналд Трамп энг зўр “Кадиллак”ка ўтириш арафасида турибди.

Яқинда Обаманинг гаражидаги автомобилларни пулемёт, гранатомёт ва замбараклардан отиш бошланади. Ажабланманг. Шу йўл билан машинанинг нозик жойлари аниқланади ва янада пишиқ қилиб ишланади.

Россия президенти ҳозирча немис автомобилида

Россия президентининг автомобили океан ортидаги “ҳамкасб”идан камтарроқ. Бир замонлар ЗИЛ заводида биринчи котиб учун махсус зирҳли капсулали автомобиллар ишланар эди, аммо ҳозир у сувлар оқиб кетди. Цех ўрнида ҳозир идора қурилмоқда.

Россия президенти ҳозир серияли Mercedes-Benz S600 Pullman Guard русумида юради. Чўнтаги бақувват исталган фуқаро бунақа автомобилни сотиб олиши мумкин. Тўғри, президент машинаси махсус алоқа воситалари ва хавфсизлик таъминоти билан ажралиб туради.

Путиннинг хизмат автомобили Mercedes-Benz S600 Pullman Guard

Ғилдираклар базаси 4,31 метр, узунлиги эса 6,35 метрга етади. 12 цилиндрли 5,5 литрли моторининг қуввати 517 от кучига тенг.

Тўғри, ҳозир президент учун махсус автомобиль тайёрлаш ишлари кетмоқда. “Кортеж” лойиҳаси хусусида carzone.uz хабар берган. Лойиҳада биратўла бир неча русум ҳамда кузатиб борувчи йўлтанламаслар ясаш режалаштирилган. Аммо лойиҳа суръати тўғрисида батафсил янгилик ҳали ошкор этилмади.

Германия етакчиси “Мерседес”ни маъқул кўради

Автомобилсозликнинг йирик марказларидан бўлмиш Германияда давлатнинг асосий раҳбари ким эканлиги баҳсли. Канцлерми ё мамлакатнинг федерал президентими?

AUDI A-8 D3 4E Security

Ангела Меркел 500 от кучига эга Audi A-8 D¾E Security автомобилида юради, Йоахим Гаук эса Путин каби Mercedes-Benz S600 Pullman Guard автомобилини афзал кўради. Бу автомобиллар граната ва ўқдан ҳимояланган, аммо оддий автомобилларнинг узайтирилган варианти бўлиб кучли ўт очишга дош беролмайди.

Франция президенти томи тешик автомобилда юради

Энг ғалати автомобиллар Франция президентларида учрайди.

Citroen DS5

Шарл де Голл давридан бери француз президентлари Citroen DS автомобилида юради. Бугунги Citroen DS гибрид моторли, узайтирилган хэтчбекдир. Осмаси пневматик, зирҳи фақат ўқни қайтара олади. Қолаверса, Франсуа Олланд автомобилнинг топқопқоғидан кўриниб, халойиққа пешвоз чиқишни яхши кўради. Гибрид моторининг қуввати 300 от кучидан ортмайди.

Буюк Британия: Rolls-Royce, Bentley ёки Range Rover

Rolls-Royce Phantom VI

Қиролича Елизавета II Rolls-Royce Phantom VI ёки Bentley Arnage Red Label автомобилида юради. Малика “извош”ларининг, ҳатто ойнасига ҳам ўқ ўтмайди. Аммо қиролича оиласининг таъбига анчадан бери Range Rover русумлари ўтириб қолган. Автомобиллар тузилишига кўра серияли версиясидан катта фарқ қилмайди, фақат шоҳона жиҳозланган. Улар шу йилнинг июлида Елизавета Iiнинг 90 йиллик тўйида иштирок этди.

Бироқ мамлакат бош вазири зирҳланган Jaguar Super XJ V8 лимузинида юради. Бу автомобиль махсус буюртма асосида ясалган бўлиб, кўпқаватли ҳимоя тизимига эга. Кимёвий ҳужум ва катта калибрли қуролдан ўт очиш унга таъсир қилмайди, аммо танкка қарши гранатомёт олдида ожиз.

Япония императорининг автомобили кам

Японияда ҳам Британиядагига ўхшаш анъана шаклланган. Император Акихито ва унинг рафиқаси Митико учун Toyota Century Royal лимузини махсус ишланган. Лимузиннинг 12 цилиндрли 5 литрли мотори 400 от кучига эга.

Toyota Century Royal кунчиқар юрт императори хизматида

Япон императорининг автопаркида ўн йиллардан бери тўрт автомобиль сақланади. Император машинасини тез-тез янгилайдиганлардан эмас. Унинг отаси Nissan Prince Royal лимузинида юрган. Зирҳланган автомобиль ўқ ўтказмайди. Давлат рақами ўрнида император муҳри тасвири бор. Орқа эшикларига тож-тахт рамзи бўлмиш хризантеманинг 16 гулбарги расми туширилган.

Дарвоқе, Япония бош вазирини гибрид моторли, зирҳланган Lexus LS600hL машинаси олиб юради.

Хитой раҳбари автомобилининг технологияси сир сақланади

Хитой ҳукумати автомобилига катта аҳамият берилади. Давлат раҳбарининг FAW HongQi HQE лимузини Хитой Халқ Республикасининг 60 йиллигига атаб тайёрланган.

FAW Hong Qi HQE

Машина узунлиги 6,4 м, кенглиги 2,05 м, бўйи 1,72 м. Зирҳли панеллари билан қўшганда вазни 4,5 тоннага етади. 12 цилиндрли моторида 400 от кучи бор.

Автомобилнинг зирҳланганлик тизими ва характеристикаси сир сақланади. Шассиси Toyota Land Cruiserники эканлиги маълум. Лимузин Чанчундаги FAW заводиди ясалган.

news.mail.ru сайти асосида тайёрланди