Ferrari Женевада янгиланган FF суперкарини намойиш қилади

Ferrari компанияси янгиланган FF моделининг илк тизерини эълон қилди. Италиянинг Autoblog нашри хабарига кўра, суперкар тақдимоти 15 февраль куни Комо кўлида жойлашган Вилла Эрбадаги тадбирда бўлиб ўтади. Унинг оммавий намойиши эса март ойида ўтказиладиган Женева автосалонида ташкиллаштирилади.

2015 йил аввалида Скандинавия шимолида услуби ўзгартирилган Ferrari FF суперкари синовдан ўтказилаётгани қайд этилган эди. Суратлардан автомобиль кузовининг олд қисми янгича кўринишдаги бампер, шакли ўзгартирилган асосий чироқларга эга бўлганини кўриш мумкин. Норасмий маълумотларга кўра, у карбонли том ва фаол аэродинамик қисмлар билан ҳам таъминланган.

Ferrari FF моделига олд ва орқа ғилдираклари ҳам “тортадиган” такомиллаштирилган тизим ҳамда 6,3 литр, 12 цилиндрли атмосферали мотор ўрнатилган. Двигатель қуввати нақт 700та от кучига тенг. Бироқ FF`нинг бошқа динамик хусусиятлари тўғрисида расмий маълумотлар йўқ. Айтиш мумкинки, моделнинг ҳозирги намунаси 100 км/соат тезликка чиқиш учун 3,7 сония сарфлайди. Энг юқори тезлиги эса соатига 335 километрга етади.

Дастлабки Ferrari FF автомобили 2011 йили Женева автосалонида намойиш қилинган эди. У барча ғилдираклари илдамловчи бўлган илк италян машинаси сифатида тарихга кирди. Шунингдек, уч эшикли машина Apple CarPlay интерфейси ўрнатилган дунёдаги биринчи автомобиль ҳамдир.