Fiat раҳбари Ferrari LaFerrari’нинг очиқ версияси чиқарилишини тасдиқлади

Ferrari компанияси LaFerrari гиперкарининг Spider қўшимча номи билан ажратиб кўрсатиладиган, усти очиқ модификациясини чиқаради. Бу ҳақда Италия маркаси раҳбари Сержио Маркионне Automobile нашрига берган интервьюсида маълум қилди.

Маркионнедан LaFerrari’нинг нисбатан кам экстремал талқини чиқарилиши эҳтимоли ҳақидаги миш-мишларга ойдинлик киритиш сўралган. “LaFerrari’га алоқадор ягона янги маҳсулот — унинг Spider номли усти очиқ версиясидир. Тегишли харидорлар билан бу борада музокараларга киришганимиздан буён бу сир бўлмай қолган”, — деди Маркионне.

“Феррари” раҳбари родстернинг бозорда пайдо бўлиши саналари ҳақида аниқ маълумот беришдан тийилди. Норасмий маълумотларга кўра, 2017 йилда бозорда пайдо бўлади.

Ferrari LaFerrari гиперкарининг дебюти 2013 йил баҳорида, Женева автосалонида бўлиб ўтган эди. Купе 963 от кучига эга гибрид двигатель билан таъминланган бўлиб, у ҳажми 6,3 литр, қуввати 800 от кучи бўлган мотор ва 120 киловаттли электромоторни ўз ичига олган. У етти босқичли “робот” қути билан ҳамоҳангликда ишлайди.

Гиперкар атиги уч сония ичида соатига 100 километрлик тезликка эриша олади, унинг энг юқори тезлиги соатига 350 километр билан чекланган. Ҳозиргача 499 LaFerrari чиқарилган бўлиб, уларнинг бари сотилиб бўлган.