Fisker карбон ва алюминийдан ясалган EMotion электрокарининг тасвирини кўрсатди

Дизайнер Хенрик Фискер янги электромобиль тайёрлаётгани хусусида илгари бир неча бор хабар бердик. Дизайнер шу кунларда твиттер саҳифасида бўлғуси электромобиль кузовининг орқа қисми расмини жойлаштирди. Электрокар Emotion деб номланиб, тўла заряди билан 645 км йўл босиши айтилмоқда.

Autocar нашри ёзишига қараганда Fisker Emotionни ясашда карбон ва алюминийдан фойдаланади. Батареялар комплектини Fisker Nanotech бўлинмаси графен асосида тайёрлайди. Аккумуляторлар машинанинг полида жойлашади.

Электромобилнинг тўлиқ тавсифи, ҳозирча, келтирилмади. Автоном тарзда бошқарилиши учун кўплаб радар ва сенсорлар ўрнатилиши, эшиклари қуш қаноти кўринишида тепага очилиши, адаптив диод чироқлари, кенг-мўл орқа ўриндиқлари маълум қилинган. Қолаверса, жаноб Фискер “тизим ўз эгаси билан жўшқин мулоқотга кириши”ни гуллаб қўйган.

Фискер биринчисининг ортидан иккинчи русумини ҳам чиқаришни режалаштираётибди.

Aston Martin DB9 ва BMW Z8 автомобиллари устида ишлаган Хенрик Фискер октябр ойида ўз автомобиль компаниясини ташкил этишини эълон қилганди. Унинг аввалги Fisker Automotive фирмаси хитойлик Wanxiang Group компаниясига сотилган ва номи Karma Automotiveга ўзгарган эди.

Фискернинг янги компаниясининг номи Fisker Inc, унинг таркибига батареялар тайёрлашга ихтисослашган Fisker Nanotech бўлинмаси киради.