Ҳарбийча бўялган Ferrari 458 Italia 1,1 миллион долларга сотилди

Ҳарбийчасига — камуфляж усулида бўялган Ferrari 458 Italia купеси Канндаги кимошди савдосида 1,1 миллион долларга сотилди. Машина дизайнини унинг эгаси — Лапо Элканн тайёрлаган. У Garage Italia Customs тюнинг-ательеси асосчиси, Fiat компаниясига эгалик қилувчи Аньелли оиласи ва аъзоси ва Fiat’нинг собиқ маркетологи ҳисобланади.

Савдо “Кино ОИТСга қарши” ташкилоти томонидан ташкил этилган, сотувдан тушган пулнинг барини Элканн хайрияга йўналтирган. Камуфляж экстерьеридан ташқари, сотилган машинанинг интерьери ва двигатели ҳам ўзига хос тарзда безакланган, марказий панелига эса Элканнинг дастхати туширилган эди.

Ferrari 458 Italia’нинг капоти остида ҳажми 4,5 литр, қуввати 570 от кучига тенг V8 мотор бор. У 3,4 сонияда соатига 100 километрлик тезликка эриша олади. Автомобилнинг энг юқори тезлиги соатига 325 километрни ташкил этади.

2009 йилдан бери ишлаб чиқарилган Ferrari 458 Italia купеси ўрнини 2015 йилда 488 GTB модели эгаллаган. Суперкар ҳажми 3,9 литр, қуввати 670 от кучига тенг турбомотор билан таъминланган. У уч сония ичида 100 тезликка эриша олади, энг юқори тезлиги соатига 330 километрлик кўрсаткич билан чекланган.

2015 йилнинг ёзида 488 GTB модель қатори Spider деб номланган очиқ версия билан тўлдирилган. Кузда эса моделнинг пойгачи версиялари — GTE ва GT3нинг савдоси бошланган эди.