Италия полициячилари Lamborghini Huracanда юради
Италиялик йўл ҳаракати посбонлари соатига 300 км тезликда ҳаракатланишга қодир суперкарга ўтирди. Энди тартиббузарлар полициядан қочиб қутула олмайди.
Италиянинг Болоня шаҳри йўл инспекцияси ходимлари автопаркига Lamborghini Huracan суперкари қўшилди. The Drive нашрининг ёзишича, машинани полицияга бериш қарорини “Ламборжини” бош директори Стефано Доменикале қабул қилган. Бу италян полицияси ихтиёридаги иккинчи спорткардир. Аввалроқ Рим инспекторлари Gallardo автомобилидан фойдалана бошлаган.
Полициячилар энди тезлик чекловини бузиб қочаётганларни зумда тутиб олишади. Шунингдек, ЙТҲларга тезда етиб боради. Полиция эҳтиёжи учун спорткарга пистолет ўрнатгич, полиция радиоси, компютер ва бошқа жиҳозлар ўрнатилди. Спорткарда тиббий анжомлар ҳам бор. Салонда музлаткич бўлиб, унда трансплантация учун мўлжалланган аъзолар ёки қуйиладиган қонни олиб юриш мумкин.
Эслатиб ўтамиз: Lamborghini Huracan 5,2 литрли бензинли двигателга эга бўлиб, қуввати 610 от кучига етади. Мотор етти поғонали узатмалар қутиси билан ишлайди. Суперкар 3,2 сониядаёқ юз тезликка чиқади.