Kode57: Ferrari Enzo дизайнеридан янги суперкар

Собиқ Pininfarina дизайнери, Ferrari Enzo суперкарининг модельери сифатида танилган Кен Окуяма Monterey Car Week автошоусида ўзининг янги ишланмасини мухлислар эътиборига ҳавола қилди.

Янги модель Kode57 номи остида чекланган миқдорда фақат буюртма асосида ишлаб чиқарилади. Модель Токиода жойлашган Ken Okuyama Design ательеси томонидан лойиҳалаштирилган. Айтишларича, суперкар Ferrari 599 GTB қисмларидан ясалган альюминий шассида ҳаракатланади. Моделга V-12 туркумидаги двигатель ўрнатилган.

Суперкар номидаги “57” рақами, Окуяманинг изоҳ беришича, турли афсонавий автомобиллар яратилган ва моторспорт пайдо бўлган 1957 йилни билдирар экан.

Kode57’нинг олд қисми бутунлай Enzo моделидан илҳомланиб яратилган, бироқ суперкар, умуман олиб қараганда, Окуяма томонидан тайёрланган бошқа модель — Ferrari Rosso’га жуда ўхшайди. Ferrari Rosso 2000 йилда Pininfarina концепти асосида компаниянинг 70 йиллиги муносабати билан яратилган эди. Ferrari Rosso эса ўз навбатида 550 Maranello модели базасида ишлаб чиқарилган.

Корпус панеллари графит толадан тайёрланган, корпусда ҳаво айланишини таъминлаш мақсадида турли кесмалар бажарилган. Kode57’даги қизиқарли элементлардан бири унинг олд қанотида жойлашган махсус сектордир. Ушбу сектор ёрдамида ҳайдовчи олд ғилдиракларнинг ҳаракатини кузатиши мумкин.

Бириктириш қисми машҳур Novitec Rosso регулятори ёрдамида ишлаб чиқилган. Регулятор олд қисмдаги баландликни 45 миллиметрга кўтариш имкониятини беради. Суперкар 21 дюймли Pirelli P Zero шиналарида ҳаракатланади.

Ҳозирча ушбу моделнинг нечта ишлаб чиқарилиши ва нархи ҳақида маълумот берилмаган.