Mercedes-Benz суперкар услубида моторли яхта ишлаб чиқарди

Mercedes-Benz компаниясининг саноат дизайни бўйича бўлинмаси – Mercedes-Benz Style Ложувард қирғоқда Arrow460–Granturismo моторли яхтасининг илк намунасини тақдим этди. “Мерседес” деб номланган 14 метрли кема умумий қуввати 960 от кучига тенг бўлган иккита дизелли двигатель билан таъминланган. Унга 10 нафаргача йўловчи жойлаша олади.

Кема Британиянинг Silver Arrows Marine яхта верфи билан ҳамкорликда ишлаб чиқилди. Дизайнерларнинг ғоясига кўра, яхта F015 ва Concept IAA концепт-карлари хусусиятларини ўзида мужассамлаштирган Mercedes-Benz суперкарларини эслатиши лозим.

У конденционер, аудиотизим, ваннали хоналар, алоҳида гардероб, махсус ичимликлар сақлаш жойи, муз тайёрлаш учун ускуна, силжитиладиган ён ва кўтариладиган олд ойналар билан таъминланган. Яхта интерьерини ишлаб чиқишда эвкалипт ва нубук дарахтларидан фойдаланилган.

Яхтанинг крейсер тезлиги шамолсиз муҳитда соатига 28-30 узел (бир узел – 1853 м/соат)га тенг, энг юқори тезлиги – 40 узел.

Бундай яхталардан 10 дона қурилган бўлиб, барчаси ўз харидорларига етказилган.

Битта кеманинг тахминий нархи 1,7 миллион доллар атрофидани ташкил этади.

Бундан аввалроқ эса Mercedes-Benz компанияси моторли яхталар ишлаб чиқиш бўйича Cigarette Racing фирмаси билан ҳамкорликни йўлга қўйган эди. Ушбу фирма билан биргаликда ягона нусхадаги кема русуми тайёрланиб, 1,2 миллион долларга сотилди. Бошқа бир кема эса 2251 от кучига эга электр қувват қурилмаси билан жиҳозланган.