Mercedes илк бор AMG C63 кабриолетини синовга чиқарди

Кабриолет кузовли автомобилни Европа йўлларида синаш ишлари ўтказилаётганда эпчил фотографлар расмга олишга улгурди. Бу автонинг тақдимоти 2016 йилда йирик автосалонлардан бирида ўтказилиши кутилаётган эди.

Тарқалган суратларга қараганда машина дизайни тўлалигича AMG C63 купесининг ўзи. Томи енгил тахланади, ости ерга ёпишганроқ, ишланган газларни чиқарувчи тизими ҳам бошқача.

Кабриолет 4,0 литрли V8 турбомоторга эга. Двигатель қуввати 469 от кучига тенг, айланиш моменти эса 648 Н·м. Агрегат олти поғонали SPEEDSHIFT MCT трансмиссия билан ишлайди. Автомобилнинг орқа узатмали ва тўла узатмали модификациялари бор.

Аввалроқ Мерседес компанияси S-Class янги кабриолет модификациясини намойиш этган эди. Европада мазкур автомобилнинг савдоси келаси йил баҳордан бошланади. Янги S-Class кабриолети 1971 йилдан бери Мерседеснинг биринчи усти очиқ тўрт ўринли автомобили бўлганди. Машинанинг тахланувчи томи шундай ишланганки, дизайн S-Class Coupe билан бир хил кўринади. Аммо кабриолетнинг орқа қисми тахланган тентни жойлаш учун сал каттароқ ишланган.

Автомобиль асос версияси ҳам турбо мотор билан жиҳозланади, двигатель қуввати ва айланиш моментида бир оз фарқ мавжуд. 100 км/соат тезликка 3,9 сонияда эришади, энг юқори тезлиги эса 250 км/соат.