Мерседес янги GLS йўлтанламасини кўрсатди

Немис автомобилсозлари каттакон йўлтанламас автомобилни намойиш қилди. Бу асли GL вариантининг модернизацияланган ва номи ўзгарган кўринишидир. Машинасозлар ғурур билан йўлтанламаслар орасида ҳақиқий S-класс дея таъкидламоқда. Улар кўп жиҳатдан ҳақдир, чунки бу йўлтанламас бекаму кўстлиги ва қулайлиги билан ажралиб туради, янгиланган русумдагиси эса янада зўр бўлиши табиий.

Немислар автомобиль устида қаттиқ ишлашган. Радиатор панжараси янги қўйилган, ундаги уч юлдузли эмблема йириклашган, бамперлар, орқа чироқлар янгича тус олган. Салон ўзгариб кетган. Сенсор панелга бармоқ билан ёзиш ва навигацион тизимда йўл кўрсатиш мумкин. Шунингдек GLда тўрт кегайли руль GLSда уч кегайлига айланган.

Капот остида ҳам ўзгариш йўқ эмас. 4,7 литрли V8 двигатели илгари 435 от кучи берган бўлса, энди бу кўрсаткич 449га етган.

Автомобилга янгича хавфсизлик тизими ўрнатилиши ҳам табиий. GLS ишорани “тушунади”, йўлдаги бошқа автомобиллар билан масофани сақлайди, пиёдаларни “пайқай олади”, тунги кўриш тизими билан жиҳозланади.