Москвада “ақлли автомобиллар” яратиш мавзуида конференция ўтказилади

28 апрел куни Россия пойтахтида йиллик Conneсted Car саммити бўлиб ўтади. Кўргазма-конференция маросими ўтказиладиган жой — Courtyard Marriott Moscow City Center.

Конференцияда Google Automotive, Connected Car Samsung Mobile, Yandex Automotive Lab, Skolkovo Foundation ва бошқа кўплаб илғор технологик компаниялар вакиллари иштирок этади.

“Ақлли автомобиль”, “тармоқдаги автомобиль” яратиш устида нафақат Apple ва Google каби наҳанг компаниялар, балки Daimler ва Volvo сингари автокорхоналар ҳам ишламоқда. Даймлер яқинда ҳайдовчисиз юк машинасини муваффақиятли синади, Волво эса келгуси йили тўла автоматлашган автомобиль ишлаб чиқаришни бошлайди. Nissan, Audi, Tesla, Ford, Toyota, Mercedes-Benz ва ҳатто КамАЗ 2020 йилдан “ақлли автомобиль” ишлаб чиқаришга ваъда берган.

Carzone.uz изоҳи: “Тармоқдаги автомобиль” (инг. Connected Car, рус. подключенный автомобиль) интеллектуал тизимлар билан жиҳозланган, интернет-хизматларга эга транспорт воситасидир. Бундай автомобиль бошқа машиналар ва ташқи объектлар билан доимий алоқа ўрнатади. Замонавий экспертлар “тармоқдаги автомобиль” яратилганлигини худди юз йил аввал илк бор автомобиль ишлаб чиқарилгани сингари “автосаноат инқилоби” дея баҳолашмоқда.