Немислар энг яхши тормозланадиган автомобилни аниқлади

Бакир Назаров
07-10-2016

ADAC автомобиль клуби тормозланиш йўли энг қисқа бўлган авторусумлар рейтингини чоп этди.

Рейтинг сўнгги тўрт йилда чиқарилган 500дан ортиқ автомобилни ҳайдаб синашга асосланиб тузилди. Рейтингнинг мутлақ ғолиби Porsche Carrera 911 кабриолети бўлиб чиқди. Кабриолет соатига юз км тезликда ҳаракатланганда тормозланиш йўли 31,3 метрни ташкил этди.

ADAC тестлари қисқа тормозланиш йўли нафақат замонавий спорткарларга, балки оддий автомобилларга ҳам хос бўлишини кўрсатди. Масалан, компакт синфга мансуб Mini One D хэтчбекининг тормозланиш масофаси 32,7 м. Ўрта синф орасида энг яхши тормозланадиган Seat Leon ST 1.6 TDI ва Volkswagen Golf Variant 2.0 TDI MBT русумлари бўлиб чиқди. Улар 33,1 мда тормозланди.

Тормозланиш масофаси энг узоқ русум Citroen Jumper Combi бўлиб, тўхтагунича 47,8 м йўл босади. Турган гапки, бу мақташга арзигулик кўрсаткич эмас.

ADAC экспертлари машинанинг маркаси ва синфидан қатьи назар ҳайдовчи йўлда масофага риоя қилишини эслатди. Бундан ташқари тормозланиш йўли узунлиги тезликнинг квадратига мутаносиб саналади. Бу тезлик икки баробар ошса, тормозланиш йўли тўрт баробар ошади дегани.

ADAC тестига мувофиқ тормозланиш йўли энг қисқа бўлган компакт синфга мансуб автомобиллар рўйхати

Марка	Авторусум	Тормозланиш йўли, метр
Mini	One D	32,7
Mini	Cooper	33
Smart	Forfour 1.0	34,4
Skoda	Roomster 1.2 TSI Green Tec	34,5
Ford	Fiesta 1.0 EcoBoost	34,9
Renault	Clio 1.2 16V 75	35
Hyundai	i20 1.1 CRDi	35,1
Skoda	Fabia Combi 1.2TSI	35,2
Volkswagen	Polo 1.4 TDI BMT	35,4
Volkswagen	Cross up! 1.0	35,5

ADAC тестига мувофиқ тормозланиш йўли энг қисқа бўлган голф синфга мансуб автомобиллар рўйхати

Марка	Авторусум	Тормозланиш йўли, метр
Seat	Leon ST 1.6 TDI	33,1
Volkswagen	Golf Variant 2.0 TDI MBT	33,1
Audi	A3 Sportback 1.4 TFSI	33,7
BMW	220i Coupe	33,9
Mercedes-Benz	B 200 Natural Gas Drive	34,1
Volvo	V40 T2	34,2
Nissan	Pulsar 1.5 dCi	34,5
Skoda	Rapid 1.2 TSI	34,7
Ford	Focus 1.0 EcoBoost	34,8
Renault	Megane ENERGY TCe 130	34,8