Nexia-3 ni navbatsiz xarid qilish mumkin biroq Lacettiʼni 33 000 dan ortiq mijoz kutmoqda

Ikki oy ichida deyarli 40 mingta avtomobil ishlab chiqarildi, bu — oʻtgan yilga qaraganda koʻproq, lekin 2020 yilga qaraganda kamroq.

Yilning dastlabki ikki oyida Oʻzbekistonda 39 922 dona avtomobil ishlab chiqarilgan, deya xabar bermoqda Davlat statistika qoʻmitasi.

2021-yilning shu davriga nisbatan bu koʻrsatkich 78,5%ga oshdi. Biroq pandemiyagacha boʻlgan darajaga hali erishib boʻlmadi — ishlab chiqarish 2020-yilning yanvar-fevral oylariga nisbatan 18,5% ga kam.

Lacetti-Gentra avtomobillari ishlab chiqarish hajmi oʻtgan yilga nisbatan 4 barobardan ortiq koʻpayib, 12 340 dona avtomobilni tashkil etdi. Shuningdek, Cobalt ishlab chiqarish 76% ga oshdi, — ikki oy ichida 10 787 dona ishlab chiqarildi.

Fevral oyida ushbu ikki modelning chiqarilishi yanvar oyiga nisbatan qariyb ikki baravarga oshdi — 7394 Cobalt va 8124 Lacetti.

Ikki oy ichida yigʻish liniyalaridan 9283 ta Damas avtomobili chiqib ketgan (fevralda 5631 tasi shu jumladan), bu oʻtgan ikki yilga nisbatan koʻpdir. Bundan tashqari, Labo va boshqa “ixtisoslashtirilgan” mashinalar ishlab chiqarish uch barobarga oshib, 3720 donaga yetdi.

Shu bilan birga, oʻtgan yilga nisbatan byudjet modellarini ishlab chiqarish biroz kamaydi. Ikki oy ichida atigi 890 Spark va 2902 Nexia chiqarildi.

Shu bilan birga, fevral oyida ikkala modelning ishlab chiqarilishi yanvar oyiga nisbatan oshdi: Spark — 1,75 marta (567 donaga), Nexia — 3 barobardan ortiq (2189 donagacha).

Uzavtosavdo boti xabariga koʻra, Nexia-3 sotib olish uchun navbat tugatilgan. Hozir zaxirada 3537 ta avtomobil mavjud.

Biroq boshqa ommaviy modellar uchun navbatlar qolmoqda. Maqolani yozish vaqtida 2579 kishi Spark yetkazib berishni, 15,8 ming kishi Cobaltni, 33,8 ming kishi Lacettini, 38,2 ming kishi Damasni kutmoqda.