Россиянинг энг арзон автомобиллари рўйхати тузилди

Бу рўйхат февраль ойи натижаларига асосланади. Ўтган рўйхатлардан бир оз фарқ қилади, бунга сабаб рубль курсининг барқарор эмаслигидир. Қолаверса, бир қатор автокомпаниялар иқтисодий вазиятдан келиб чиқиб россиялик харидорларга чегирмалар таклиф этишмоқда.

Арзон ўнликнинг бошида Ravon Matiz турибди. Асос вариантини РФ аҳолиси 314 минг рублга харид қилиш имкони бор. 0,8 литрли мотор ва 51 от кучига эга.

Иккинчи поғонада Smily хэтчбеки бўлиб, баҳоси 319 минг 900 рублни ташкил этади.

Учликни Lifan Smily New якунлайди. Тўртинчида Lifan Celliya русуми бўлиб, иккаласининг нархи бир хил – 364 минг 900 рубль.

Бешинчи қаторда РФнинг ўз маҳсулоти Lada Granta. Унинг баҳоси 389 минг 900 рубль.

Ультраарзон хэтчбекка айланган Lada Priora 389 минг рубль нарх билан олтинчи ўриндадир. Тахминан шунга яқин нархда Geely GC6 русумини ҳам сотиб олиш мумкин. Ундан кейинги ўринларда Chery Bonus ва FAW V5 автомобилларидир.

Ўнликнинг охирги ўрнини Renault Sandero машинаси эгаллаган. Россиялик харидорларга 399 минг рубль баҳода тақдим этилган.