SEMA тюнинг-шоусининг энг яхши 10 премьераси

Лас-Вегас шаҳрида автомобиль жиҳозларининг йиллик SEMA (Specialty Equipment Market Association) кўргазмаси очилди. 1967 йилдан бери ўтказиб келинаётган шоуда бугун жаҳоннинг турли мамлакатларидан келган бир-биридан қизиқарли тюнинг лойиҳаларни учратиш мумкин. Айтиш керакки, SEMA ёпиқ тадбир саналади, унда ҳамма ҳам қатнаша олмайди. Қуйида кўргазманинг энг диққатга сазовор янгиликларидан ҳикоя қиламиз.

Mazda MX-5 Speedster Evolution и RF Kuro

Ноёб спидстерни ўтган йили японлар Лас-Вегасда намойиш этган, аммо бу нусхаси 45 кгга енгиллашиб, 898 кгни ташкил этди. Анъанавий ускуналари рақамли вариантига ўзгартирилгани, Brembo тормоз механизмидан воз кечилгани ва аккумулятор кичиклаштирилгани ҳисобига спидстер вазн ташлади. Ундан ташқари, прототипнинг аэродинамик тўсқичи (обвес) карбондан ясалган. Осмасини ростласа бўлади. 17 дюймли ғилдиракларига пойгабоп шина кийдирилган.

Dodge Challenger Shakedown

Chrysler ва Dodge автомобиллари асосида спорткарлар тайёрлайдиган Mopar тюнинг-ательеси Shakedown номли ретро-концептни кўрсатди. У 1971 йилги Dodge Challenger купеси асосида қурилган. Автомобиль асосида махсус ишланган платформа ётибди, кузови эса 40 йил олдин қандай чиқарилган бўлса, шундайлигича қолган. Двигатели замонавий, яъни 6,4 литрли, атмосферали V8 агрегат қуввати 485 от кучига тенг. Олти поғонали механик трансмиссия Dodge Viperдан ўзлаштирилган. Шунингдек, рули ва спортча ўриндиқлари ҳам Viperга тегишлидир. Чарм ва замш қопланган салондаги хавфсизлик каркаси йўловчиларнинг бехатар юришини таъминлайди.

Ford Mustang

Timeless Kustoms муаллифлик қилган яна бир ретро-автомобиль 1965 йилда чиқарилган Ford Mustang асосида тайёрланган. Аммо у обдан бежалганлиги боис аслига унча ўхшамайди. Шассиси Chevrolet Corvette элементлари асосида қайта ишланган, 19 дюймли ғилдираклар ва карбон тормозга эга. Тутун чиқариш қувурини MagnaFlow мутахассислари тайёрлади. “Мустанг”нинг энг эътиборга молик хусусияти 5,1 литрли минг от кучига эга моторидир. Ускуналар панели ўрнида спортча табло. Қип-қизил салон ретрокар ва келажак автомобиллари дизайнини ўзида уйғунлаштирган.

Lexus LC 500

Япон спорткупеси яқиндагина бозорга чиқди, аммо Beyond Marketing мутахассислари дарҳол ўзларининг версиясини тайёрлаб бўлди. Санаб ўтадиган бўлсак, аввало, ён этаклари узайганлиги, олд ҳавокесари (сплиттер) ва орқа диффузори туфайли янада спортча қиёфа касб этган. Қора кегайли 22 дюймли ғилдиракларга Pirelli P Zero Nero шиналари кийгазилган. Осмасининг пружиналарини ростлаш мумкин. Машина туби анчагина паст. Салонда карбондан ясалган пойгабоп ўриндиқлар ва хавфсизлик каркаси пайдо бўлган. Энг муҳими двигатель қуввати 471 от кучидан 525 от кучигача етган. Club DSPORT компаниясининг моторсозлари, керак бўлса, 942 от кучига эга двигатель ҳам тайёрлаб бера олади.

Chevrolet Camaro Turbo AutoX Concept

Концептуал Turbo AutoX Concept нусхасини Лас-Вегасга Chevrolet олиб келди. Серияли ишлаб чиқариладиган Camaroда 2 литрли 4 цилиндрли 238 от кучига эга мотор бўлса, тюнинг усталари унга спортча тус беришга киришди. Қаттиқ осмалар, ростланадиган амортизатор, 20 дюймли енгил қотишмали дисклар қўйилиб, эксклюзив тусда бўялганидан сўнг машина қанот қоқиб учишга тайёр бўлди. Қолаверса, вентиляцияланувчи капот ва кучайтирилган тормоз тизими бор.

Tesla Model X

Тюнинг усталари электромобиллар билан кўп шуғулланавермайди. Аммо Model X уларнинг қўлидан ўтди. Unplugged Performance тюнингчилари янги бампер, зинасига қоплама ва карбон антиқанот қўйгач, Model X сезиларли ўзгарди. Спортча шиналар, керамикали Brembo тормози ва янгича ғилдирак дисклари қўйилди. Туби анчагина пастлиги туфайли, Model X кроссовер эмас, бинойидек спорткарга ўхшайди. У 100 км/соат тезликка беш сонияда эришади, энг юқори тезлиги соатига 250 км. Йўл захираси 400 кмдир.

Jeep Wrangler CJ66

Ушбу йўлтанламас қиёфаси тарихий Jeep Wrangler CJ автомобилига ўхшайди. Аниқроғи, 1966 йилдаги версиясига. 17 дюймли улкан қора дискларига вездеходбоп қалин покришкалар кийдирилган, натижада ғилдиракнинг умумий ўлчами 35 дюймни ташкил этган. Салонга ростланадиган хавфсизлик каркаси ўрнатилган. Олд ойнаси 2 дюймга кенгайтирилган. Ёрлиқчаси машинага 5,7 литрли Hemi мотор ўрнатилганлигидан далолат беради. Mopar тюнинг пакети шарофати билан қуввати 383 от кучига етган.

Hyundai Elantra Ark Performance

“Элантра” Hyundai компанияси SEMA учун тайёрлаган тўрт лойиҳадан биридир. Концептуал ARK Road Racerни Hyundai Motor America бўлинмаси инженерлари ARK Performance мутахассислари иштирокида ясади. Оилавий седаннинг ғилдирак аркалари кенг-мўл. Осмаси пастак. Капот шамоллатиладиган, унинг остида қайта ишланган 2 литрли турбокомпрессорли двигатель бор. Машина қуввати ҳақида, ҳозирча, билмаймиз. Тормози кучайтирилган. Спортча руль ўрнатилган.

“Элантра”дан ташқари корейслар Лас-Вегасга ясатилган Veloster ва иккита Santa Fe кроссовери олиб келишди.

Kia Sorento Ski Gondola

Sorento Prime асосида ясалган гусеницали кроссовер қатнашчиларнинг эътиборини тортмай қолмайди. Бу кроссовер расми кўплаб сайтларнинг бош саҳифасини безади. Хўш, унга занжир нега керак? Маълум бўлишича, кроссовер тоғ чанғиси спорти ишқибозлари учун тайёрланган. Кроссовер чанғичиларни тоғ чўққисига олиб чиқади, бунинг устига ҳайдовчисиз режимда бошқарилади. Музламаларда ҳаракатланиш учун Dominator фирмасига тегишли гусеницаси бор. Томига эса чанғи ва бошқа спорт инвентарлари жойлаштирилади. Ботинка ва бошқа ашқол-дашқолларни юкхонага сиғдириш мумкин. Орқа эшиклари йўналишга тескари ҳолда очилади, олд ўриндиқлари эса орқага қарата ўрнатилган. Ҳайдовчининг кераги бўлмагандан кейин, аҳвол шу-да.

Kia Soul First Class

Soul кроссовери асосида яратилган ҳайдовчисиз шаҳар автомобили бизнесменлар билан учрашувга борувчилар учун жуда боп транспортдир. Бу машинанинг руль чамбараги йўқ, ускуналар панели ғойиб бўлган, олд ўриндиқлари ҳаракат йўналишига тескари ўрнатилганини-ку, қўяверасиз. Ўриндиқ рўпарасига суюқ кристалли 40 дюймли экран жойланган. Борт тизимини бошқариш учун консолдан ўзи чиқадиган 2та планшет компютери бор. Салонга қимматбаҳо чарм ва табиий ёғочдан ишлов берилган. Кузови ёрқин кўк рангда. Ҳавотортар панжарасига диод ёритқичлар қўйилган.

autonews.ru асосида тайёрланди