Супербоулнинг автомобилга доир бешта энг қизиқарли рекламаси (видео)

Бакир Назаров
02-02-2017

Якшанба куни кечқурун АҚШда энг муҳим воқеалардан бири бўлиб ўтади. Доналд Трампнинг нутқи дейсизми? Йўқ, америкаликларни супербоулнинг финал ғолиби ҳамма нарсадан кўп қизиқтиради. Супербоул бу америкача футбол чемпионати финалидир.

Ўтган йили бу ўйинни 190 млнга яқин одам томоша қилган. Трампнинг қасамёдга келиши эса атиги 31 млн одамни қизиқтирган. Фарқни кўряпсизми? Супербоул америкаликлар учун миллий байрамдек бўлиб кетган: одамлар базмлар уюштиришади, шаҳар ташқарисига чиқишади, яқинларига совғалар улашишади.

Шубҳасиз, телевидениелар ҳам бу имкониятдан яхшигина даромад ишлаб олишади. Ўтган йили 30 сонияли реклама лавҳаси нархи 5 млн долларни ташкил этган.

Автомобиллар ҳақида хабар тарқатувчи сайтимиз нега гапни супербоулдан бошлади? Биз супербоул вақтида намойиш этилган автомобилга оид бешта энг қизиқарли рекламани сизга ҳавола этамиз.

2011 йилда Volkswagen реклама лавҳаси суратга олди. Рекламани кейинчалик “Дарт Вейдернинг ёшлиги” деб атайдиганлар топилди. Унда Дарт Вейтер либосини кийган болакай барчасини ўз кучи билан уддалашга урингани акс этади. Бу лавҳа қатор мукофотларга сазовор бўлган.

Hyundai маркасининг янги Genesis автомобилига ўтган йили ғалати реклама лавҳаси суратга олинган. Лавҳада актёр Кевин Харт қатнашган. У қизига ошиқ йигитни доғда қолдириши видеода акс этган.

Қишда кабриолетга нима бор? Аммо 2005 йилнинг февралида Ford компанияси “Мустанг”нинг усти очиқ версиясини реклама қилмоқчи бўлди. Томоша қилинг.

2007 йилда ишланган ушбу реклама ролигини энг қизиқарлиси дейиш мумкин. Лавҳада General Motors заводида ишлайдиган кичик роботча тасвирланган. У иш жараёнида хато қилиб қўйганини туш кўради. Натижада у ишдан қувилади, тиланчилик қилади, охир-оқибат кўприкдан ўзини ташлаб умрига нуқта қўяди. Бу лавҳа билан GM харидорига машина кафолати 5 йил ёки 100 минг миллигини уқтирмоқда. Бу реклама можарога ҳам сабаб бўлган, шунга қарамай сўнгги 15 йилнинг энг қизиқарли роликлари қаторига киради.

Куйлаётган қўйлар ҳақидаги бу лавҳа 2016 йилнинг энг машҳур рекламаларидан. Қўйлар Honda Ridgelineни реклама қилмоқда. Албатта, эгаси ёнида йўқлигидан фойдаланиб куйламоқда. Қўшиққа, ҳатто, ит ҳам жўр бўлади.

auto.mail.ru асосида тайёрланди

Хабарларни тез ва осон ўқиш учун Андроид иловамизни сақлаб олинг.

Мавзу: