Таиландда Honda Motor Corporationга қарашли янги завод очилди

Япон компанияси Honda Motor Corporation ва Таиланддаги Honda Automobile Thailand бўлинмаси янги завод очилганини эълон қилишди. Завод Прачинбури провинциясида қад кўтарди. Корхона замонавий экологик технологиялар билан жиҳозланган.

Расмий очилиш маросимида Таиланд Қироллигидаги Япония элчиси, ишбилармон ҳамкорлар, Honda Motor Co президенти ва бош директори ҳамда бошқа вакиллар иштирок этди.

Корхонада янгича “катакли” тартибда ишловчи инновацион ARC – Assembly Revolution Cell Line ишлаб чиқариш линияси йўлга қўйилган. Анъанавий конвейердан фарқи шуки, бир ишчи ўз хизмат доирасида бир неча хил амални бажара олади. Қолаверса, кўплаб япон заводларида синовдан ўтган экологик тоза технологиялар ўрнатилган

Янги заводда Honda Civic янги авлодини ишлаб чиқариш бошланди. Келажакда, асосан, Таиланд бозори учун мўлжалланган автомобиллар ишлаб чиқариш режалаштирилган. Бир қисми экспортга йўналтирилади.

Завод очилиши билан Таиланд Honda Motor Corporation компаниясининг ҳажм бўйича тўртинчи ишлаб чиқариш базасига айланди. “Табассум мамлакати” деб аталмиш Таиландда Хонда русумларидан энди йилига 360 мингта ишлаб чиқарилади.