Tesla компанияси Model X’нинг ҳаракат захирасини оширди

Tesla компанияси ўзининг илк кроссовери — Model X’нинг ҳаракат захираси ҳақидаги янги ахборотни эълон қилди. Конфигураторда пайдо бўлган сўнгги маълумотларга кўра, 772 от кучига эга электройўлтанламас бир марта тўлиқ қувватлантирилганида 250 миль (400 километр) йўл боса олади. Аввалроқ автомобиль 240 миль (384 километр) йўл юра олиши айтилган эди.

Tesla компанияси Model X’нинг онлайн-конфигураторини сентабрь ойида очган эди. Ундан электрик кроссовер учун олдиндан буюртма берган компания мижозларигина фойдаланиши мумкин.

Tesla Model X

Ҳозирча мазкур йўлтанламас фақат битта — Signature модификациясида таклиф этилмоқда. У иккита электродвигатель билан таъминланган. Биринчиси 262 от кучига эга бўлиб, олд ғилдиракларни ҳаракатга келтиради, орқа ғилдиракларни айлантирувчи иккинчи куч агрегатида 510 от кучи бор. Моторлар сиғими 90 киловатт-соат бўлган батареялар тўпламидан «озиқланади».

Tesla Model X Signature 3,8 сонияда соатига 100 километр тезликка эришади. Моделнинг энг юқори тезлиги соатига 250 километр билан чекланган. Электрокроссовернинг нархи 132 минг доллардан бошланади.

Tesla компанияси яна бир модель — Model 3 электроседанини дебютга тайёрламоқда. Тақдимоти 2016 йил мартида бўлиб ўтадиган тўрт эшикли мазкур автомобиль Америка компаниясининг энг арзон маҳсулоти бўлади. Седаннинг тахминий нархи 35 минг долларга тенг.